धनगढी- डाेटीको आदर्श गाउँपालिका–१ धौलामाटी जिप दुर्घटनामा घाइते थप एक जनाको मृत्यु भए संगै मृतकको संख्या तीन पुगेको छ भने पाँच जना घाइते भएका छन्।
शुक्रबार दिउँसो दिपायलबाट आदर्श गाउँपालिका वडा नं ७ दहकालिका जाँदै गरेको सु.प.प्र. ०१–००१ ज १३९५ नम्बरको जिप अनियन्त्रित भई करिब २५० मिटर तल खसेर दुर्घटनामा परेको थियो।
दुर्घटनामा परी जिप चालक आदर्श–७ दडिमाना २७ वर्षीय सुरेश कार्की र सायल–४ सुण्डकी ४१ वर्षीया हरुदेवी बिकको घटनास्थलमै मृत्यु भएको थियो भने सायल–६ कटुवाल गाउँकी ३५ वर्षीया गर्भवती काली कटुवालको जिल्ला अस्पताल डोटीमा उपचारका क्रममा मृत्यु भएको हाे।
त्यस्तै दुर्घटनामा आदर्श गाउँपालिका–३ नुवाकोटकी १४ वर्षीया अनिता बिक, अन्दाजी १६ वर्षीया स्यानु बिक, आदर्श ७ दडिमानाका २२ वर्षीय कैलाश बिष्ट, १४ वर्षीय दिपक बिष्ट र अन्दाजी ९/१० वर्षकी सविता कटुवाल गम्भीर घाइते भएका छन् । घाइतेहरूको टाउको, अनुहार, हात, खुट्टा र भित्री अंगमा चोट लागेको प्रहरीले जनाएको छ । घाइतेहरूको जिल्ला अस्पताल डोटीमा उपचार भइरहेको छ।
भर्खरै
लोकप्रिय
