जेनजी आन्दोलनमा सुदूरपश्चिमका २ सय ३२ भवनमा तोडफोड र आगजनी

धनगढी- भदौ २३ र २४ गते भएको जेनजी आन्दोलनका क्रममा सुदूरपश्चिम प्रदेशमा २ सय ३२ भवनमा आगजनी र तोडफोड भएको छ।

सुदूरपश्चिम प्रदेश प्रहरी कार्यालय धनगढीका अनुसार आन्दोलनका क्रममा १ सय ५५ सरकारी कार्यालय, ३४ राजनीतिक दलका कार्यालय, ३५ व्यापारिक तथा निजी भवन र ९ प्रहरी कार्यालयमा आगजनी र तोडफोड भएको हो।

प्रदेश प्रहरी कार्यालयका तथ्यांकअनुसार सुदूरपश्चिममा सबैभन्दा बढी सरकारी कार्यालयमा क्षति पुगेको छ। तीमध्ये दार्चुला, बझाङ र कञ्चनपुरका एक-एक तथा कैलालीका दुई सरकारी कार्यालयमा आगजनीका कारण पूर्ण क्षति भएको छ।

त्यस्तै, कैलालीका १०१, कञ्चनपुरका २४, डोटीका १०, अछामका ४, डडेल्धुराका ८ र दार्चुलाका ३ कार्यालयमा आंशिक क्षति पुगेको छ।

प्रहरी कार्यालय तर्फ ७ ट्राफिक पोष्ट र कैलालीका ३ प्रहरी कार्यालयमा पूर्ण क्षति पुगेको छ भने कैलालीका २, कञ्चनपुरका ३ र डोटीको १ गरी ६ प्रहरी कार्यालयमा आंशिक क्षति भएको छ।

यस्तै, ३५ निजी तथा व्यापारिक भवनमा पनि आगजनी र तोडफोड भएको छ। जसमा कैलालीका १५, कञ्चनपुरका १९ र डडेल्धुराको १ भवनमा आंशिक क्षति पुगेको प्रहरीले जनाएको छ। प्रहरी प्रवक्ता वरिष्ठ उपरीक्षक (एसएसपी) प्रकाशबहादुर रानाभाटका अनुसार निजी तर्फ मुख्यत: राजनीतिक दलका नेता तथा कार्यकर्ताका घरमा आगजनी भएको हो।

प्रदेश प्रहरीका अनुसार सुदूरपश्चिमका ६ जिल्लामा रहेका राजनीतिक दलका ३७ कार्यालयमा आगजनी र तोडफोड भएको छ। तीमध्ये कैलालीका २३, कञ्चनपुरका ५, डोटीका २, डडेल्धुराका ४ र दार्चुलाका ३ पार्टी कार्यालयमा आंशिक क्षति पुगेको छ। त्यस्तै, डडेल्धुराका २ संस्थागत भवनमा पनि क्षति पुगेको छ।

प्रहरीसहित ३९ जना घाइते
आन्दोलनका क्रममा प्रहरी, प्रदर्शनकारी र कैदीसहित ३९ जना घाइते भएका थिए।

प्रदेश प्रहरी कार्यालयका अनुसार कैलालीमा ११, कञ्चनपुरमा १० र डडेल्धुरामा ८ गरी ३७ जना प्रहरी घाइते भएका थिए।

त्यस्तै, कैलालीमा ३ प्रदर्शनकारी घाइते भएका थिए भने बझाङमा एक कैदी कारागारबाट भाग्ने क्रममा घाइते भएका थिए। सबै घाइतेको उपचारपछि डिस्चार्ज गरिएको प्रहरीले जनाएको छ।