काठमाडौँ- बडादसैँको आज छैटौँ दुर्गा पक्ष अर्थात् नवरात्रको छैटौं दिन हो।
यस दिन नवदुर्गामध्येकी छैटौं कात्यायनी देवीको विधिपूर्वक पूजा आराधना गरी मनाइँदैछ। सत्य र न्यायकी प्रतिमूर्ति मानिने कात्यायनी देवीलाई साहस र शौर्यकी देवीको रूपमा पनि पूजिन्छ।
कात्यायनी देवीको पूजा गर्नाले भक्तजनमा आत्मबल वृद्धि भइ शत्रुमाथि विजय प्राप्त हुने धार्मिक विश्वास रहेको छ। देशभरका शक्तिपीठ तथा देवी मन्दिरहरूमा बिहानैदेखि दर्शनार्थीको भीड लागेको छ।
राजधानी काठमाडौँको बानेश्वरमा रहेको प्रसिद्ध कात्यायनी मन्दिरमा पनि देवीको पूजा आराधनाका लागि भक्तजनहरू भेला भएका छन्।
यस दिन विशेषगरी धार्मिक विधिअनुसार कलश, देवीको प्रतिमा, र पूजा सामग्रीहरूमा कात्यायनी देवीको आह्वान गरी विशेष पूजा गरिन्छ।
नवरात्रभर शक्तिपीठहरूमा भक्तजनको चहलपहल बढ्दा दशैँको धार्मिक माहोल झनै उत्साहपूर्ण बनेको छ। भोलि सातौँ दिन कालरात्री देवीको पूजा आराधना गरिनेछ।
तस्बिरहरूः
भर्खरै
लोकप्रिय
