विराटनगर- विराटनगरमा प्रहरीले भारतबाट अवैध रूपमा भित्राइएको सयपत्री फुलको माला र लत्ताकपडा बरामद गरेको छ।
जिल्ला प्रहरी कार्यालय मोरङका अनुसार सोमबार बरगाछी चौकमा चेकजाँचका क्रममा को २ च १६३४ नम्बरको पिकअप गाडीबाट करिब १ लाख २० हजार रुपैयाँ बराबरको सयपत्री फुलको माला बरामद गरिएको हो। प्रहरी नायब उपरिक्षक कोपिला चुडालका अनुसार गाडीमा करिब ७ हजार रुपैयाँ बराबरको बाइन्डिंग तार समेत भेटिएको छ।
प्रहरीका अनुसार तिहारमा सयपत्री माला अत्याधिक माग हुने भएकाले व्यापारीहरूले भारतबाट लुकाइछिपाई माला ल्याउने गरेका छन्। घटनामा संलग्न पिकअप चालक ३६ वर्षीय सतनारायण यादवलाई नियन्त्रणमा लिइएको छ। उनी सुनसरी, बर्जु गाउँपालिका–२ का बासिन्दा हुन्।
त्यसैगरी, प्रहरीले आइतबार पनि भारतबाट अवैध रूपमा भित्रिएको करिब १ लाख ६८ हजार २ सय रुपैयाँ बराबरको लत्ताकपडा बरामद गरेको छ। बरामद कपडा विभिन्न स्थानमा लुकाएर राखिएको अवस्थामा छापामार गरी फेला परेको थियो।
बरामद सामान आवश्यक कारबाहीका लागि विराटनगरस्थित भन्सार कार्यालयमा बुझाइएको जिल्ला प्रहरी कार्यालय मोरङले जनाएको छ।
भर्खरै
लोकप्रिय
