- मोरङको बेलबारीमा जारी गोल्डकप फुटबलमा धनकुटा रारा फुटबल क्लब र प्लानिङ ब्वाइज युनाइटेड आमनेसामने हुँदैछन् ।
- प्लानिङ ब्वाइज क्लबले ए डिभिजनमा स्तरोन्नति भएपछि आजको खेलका लागि पूर्ण तयारी गरेको जनाएको छ ।
- भोजपुर जिल्ला फुटबल संघले झापा ११ लाई टाइब्रेकरमा पराजित गर्दै सेमीफाइनलमा प्रवेश गरिसकेको छ ।
बिराटनगर- मोरङको बेलबारी नगरपालिकामा जारी मेजर स्वर्गीय एनबी रुमाहाङ रनिङ गोल्डकप फुटबलको तेस्रो क्वाटरफाइनलमा धनकुटाको रारा फुटबल क्लबले बी डिभिजन लिग विजेता प्लानिङ ब्वाइज युनाइटेडको सामना गर्दैछ ।
लक्ष्मीमार्गस्थित खेल मैदानमा आजको हुने खेलमा पहिलोपटक दुवै टोली आमनेसामने हुदैछन् । ए डिभिजन क्लबमा समेत स्तरोन्नित भएको प्लानिङ ब्वाइजका अध्यक्ष दावा लामाले आजको खेलका टोली पूर्णरुपमा तयार रहेको बताए ।
बेलबारीमा पहिलोपटक सहभागिता जनाइरहेको टोलीको नेतृत्व गौरव श्रेष्ठले गर्ने जनाएका अध्यक्ष लामाले २० वर्षमुनीको राष्ट्रिय टोलीका पाँचजनासहित क्लब सन्तुलित रहेको उल्लेख गरे ।
धनकुटा र सुनसरीमा आयोजित विभिन्न ४ वटा गोल्डकपको उपाधि चुमेको क्लबले मोरङमा समेत बलियो उपस्थिती जनाउने उनको भनाइ छ । त्यसैगरी, क्लबका प्रशिक्षक सचिन्द्र धिमालले बेलबारी मैदान आफ्नो पहिचानको मैदान भएको बताए ।
अर्कोतर्फ, रारा फुटबल क्लबले प्लानिङसँगको खेललाई सहज रुपमा नलिने जनाएको छ । यसअघि, सोमबार भएको दोस्रो क्वाटरफाइनलमा जित हात पार्दै भोजपुर जिल्ला फुटबल संघ गोल्डकपको सेमीफाइनलमा प्रवेश गरेको छ ।
साविक विजेता झापा ११ लाई टाइब्रेकरमा ५–४ गोल अन्तरले पराजित गर्दै भोजपुरले अन्तिम चारको टिकट काटेको हो । निर्धारित ९० मिनेटको खेलमा दुवै टोली समान एक गोलको बराबरीमा रोकिएपछि खेल टाइब्रेकरतर्फ धकेलिएको थियो।
झापाका लागि खेलको ३९ औं मिनेटमा एरोन थापाले फ्रिकिक मार्फत गोल गर्दै अग्रता दिलाएका थिए । पहिलो हाफमा एक शुन्यले पछि परेको भोजपुरको टोली दोस्रो हाफमा खेलमा फर्किएको थियो ।
खेलको अन्तिम १० मिनेट सम्हालिन नसक्दा झापाले हार ब्यहोरेको थियो । यसक्रममा खेलको ८० औं मिनेटमा भोजपुरका लागि मिलन लिम्बूले बराबरी गोल फर्काएका थिए ।
भर्खरै
लोकप्रिय
