मोरङ-विराटनगरका पेट्रोलियम व्यावसायी पशुपति भगतमाथि गएराति सांघातिक आक्रमण भएकोछ।
वडा प्रहरी कार्यालय विराटनगरका प्रमुख डिएसपी सुरेन्द्र सिटौलाका अनुसार, गएराति करिब ७ बजे बजारबाट घरफर्कने क्रममा पशुपति भगतमाथि आक्रमण भएको हो।
वडा प्रहरी कार्यालयका प्रमुख सिटौलाका अनुसार, घटनामा संलग्न चार जनालाई पक्राउ गरिएको छ र उनीहरुमाथि अनुसन्धान सुरु भइरहेको छ।
विराटनगरको गुद्रीमा रहेको आलुको मण्डीबाट बसपार्कस्थित पम्प हुँदै घर फर्कने क्रममा चार पाँच जनाले राती ढुकेर आक्रमण गरेको प्रहरीले जनाएकोछ।
बसपार्कस्थित अन्नपूर्ण सप्लायर्स पम्पबाट उनको घर जनपथ टोल करिब आधा किलोमिटरको दुरीमा अवस्थित रहेकोछ। भगतको पेट्रोल व्यवसायसाथै तरकारी बेचविखन हुने गुद्रीमा आलुको मण्डी रहेकोछ।
घटनापछि उनलाई हाल विराटनगर अस्पतालमा उपचारका लागि राखिएको छ। उनको घुँडामा गहिरो चोट लागेकोछ। उपचारका क्रममा भेट्नका लागि पूर्व आपूर्तिमन्त्री शिवकुमार मण्डलपनि पुगेकाछन्।
धारिलो हतियारले घुँडामा बढि चोट लागेको भगतले आफूलाई सुनियोजित रुपमा विराटनगरका एलिश गुरुङ समूहले आक्रमण गरेको प्रहरीलाई बताएकाछन्।
अर्कोतर्फ प्रहरीले पक्राउ गरेको चार जनामध्ये सिद्धीकी पनि रहेकाछन्। सिद्धिकीलाई गुरुङको दाहिने हातका रुपमा लिइने गरेको प्रहरीले जनाएकोछ। यद्यपी भगत र गुरुङलाई नजिकबाट चिन्नेहरु भने घटना लेनदेनकै विषयमा हुनसक्ने बताउछन्।
भर्खरै
लोकप्रिय
