क्राइस्टचर्च– दक्षिण अफ्रिकालाई तीन विकेटले हराउँदै दुई पटकको विजेता पाकिस्तान न्युजिल्यान्डमा जारी आईसिसी यू–१९ विश्वकप क्रिकेटको सेमिफाइनल पुगेको छ। पहिला ब्याटिङ गरेको दक्षिण अफ्रिकाले निर्धारित ५० ओभरमा नौ विकेट गुमाएर एक सय ८९ रन बनाएको थियो।
दक्षिण अफ्रिकाको पालीमा विकेटकिपर वान्डाइल माकवेतुले सर्वाधिक ६० रन बनाए। पाकिस्तानका बलर मोहमद मुसाले तीन र साहिन शाह अफ्रिदीले दुई विकेट हात पारे। पाकिस्तानले ४७.५ ओभरमा सात विकेट गुमाएर लक्ष पुरा गर्याे।
पाकिस्तानका अली जार्यब आसिफले ७४ रन बनाए। पाकिस्तानले सन् २००४ र २००६ को संस्करणमा विजेता बनेको थियो भने सन् १९८८, २०१० र २०१४ को संस्करण फाइनलसम्म पुगेको थियो।
दक्षिण अफ्रिकाले सन् २०१४ को संस्करणको फाइनलमा पाकिस्तानलाई ६ विकेटले हराएर विजेता बनेको थियो। प्रतियोगिताको साविक विजेता वेस्ट इन्डिज हो। उसले फाइनलमा भारतलाई पाँच विकेटले हराएको थियो। यो प्रतियोगिता भारत र अस्ट्रेलियाले सर्वाधिक तीन तीन पटक जितेका छन्।
अस्ट्रेलिया पनि यसपटक सेमिफाइनल पुगिसकेको छ। अन्य क्वार्टरफाइनलमा न्युजिल्यान्ड र अफगानिस्तान तथा भारत र बंगलादेश भिड्नेछन्।
भर्खरै
लोकप्रिय
