खोटाङ – खोलाको बगरमा गाडिएको अवस्थामा खोटाङमा एक बालिकाको शव भेटिएको छ ।
रुपाकोट मझुवागढी नगरपालिका–१० पाथेकाका नौमणि राईकी आठ वर्षीया छोरी लुमणिको शव चिम्चिमा खोलाको बगरमा गाडिएको अवस्थामा बुधबार राति भेटिएको हो ।
बुधबार दिउँसोदेखि हराएकी बालिकाको खोजी गर्ने क्रममा हत्या गरेर घर नजिकैको खोलाको बगरमा गाडिएको अवस्थामा शव फेला पारिएको स्थानीय बासिन्दाले बताएका छन् ।
हत्या आशंकामा प्रहरीले गाउँकै गौमणि राईका १६ वर्षीय छोरा जीउधन राईलाई पक्राउ गरेको छ । घटनाको विस्तृत जानकारी आउन बाँकी रहेको जिल्ला प्रहरी कार्यालय खोटाङका प्रहरी नायब उपरीक्षक लोकदर्शन थापाले जानकारी दिए ।
“पक्राउ परेका जीउधनले आफैले बालिकाको हत्या गरेको स्वीकारेका छन्” उनले भने “के कारणले बालिकाको हत्या गरिएको हो भन्ने बारे अझै बुझ्न बाँकी छ ।”
स्थानीय बासिन्दाले भने जीउधनले बालिकाको बलात्कारपछि हत्या गरेर लुकाउनका लागि खोलाको बगरमा गाडेको हुनसक्ने अनुमान गरेका छन् । पक्राउ परेका जीउधन र मारिएकी लुमणि नाताले दाजु बहिनी हुन् । रासस
भर्खरै
लोकप्रिय
