मकवानपुर र दाङमा भएका दुर्घटनामा दुईजनाको मृत्यु

काठमाडौं – मकवानपुर र दाङमा भएका दुर्घटनामा दुईजनाको ज्यान गएको छ । मकवानपुरको हेटौंडा उपमहानगरपालिका–७ मिलनचोकमा बिहीबार राति मोटरसाइकल पल्टिन्दा चालकको ज्यान गएको प्रहरीले जनाएको छ ।

ना १८ प ४६९१ नम्बरको मोटरसाइकल बिहीबार राति ९ बजे अनियन्त्रित भएर पल्टिँदा गम्भीर घाइते भएका मिलनचोकका २१ वर्षे राकेश भुजेलको उपचारको क्रममा ज्यान गएको हो ।

यस्तै दाङमा ट्रयाक्टरको ठक्करबाट एकजनाको ज्यान गएको छ । बबइ गाउँपालिका–७ मा बिहीबार राति रा १ त २२४६ नम्बरको ट्रयाक्टरले ठक्कर दिँदा बबइ–७ चरक मटियाका १६ वर्षे मनवीर रानाको ज्यान गएको इलाका प्रहरी कार्यालय खिलतपुरले जनाएको छ । फरार रहेको ट्रयाक्टर चालकको खोजी भइरहेको प्रहरीले जनाएको छ ।