जनकपुरधाम – राष्ट्रिय जनता पार्टी (राजपा) नेपालको जनकपुरधाममा सबेको केन्द्रीय कार्य समितिको बैठक प्रदेश र स्थानीय सरकारको समीक्षा गरि सम्पन्न भएको छ ।
फागुन १० गते देखि सोमबार अबेर रातिसम्म चलेको राजपाको केन्द्रीय समितिको बैठकमा प्रदेश २ सरकार र स्थानीय निकायको प्रतिनिधिको कामकाजको समीक्षा गरिएको हो ।
पार्टी अध्यक्ष मण्डलका संयोजक महेन्द्र राय यादवको अध्यक्षतामा बसेको बैठकमा केन्द्रीय अध्यक्ष मण्डलसँग पार्टी आवद्ध प्रदेश २ का मन्त्री, राज्यमन्त्री एवं संघीय र प्रदेश सांसदसहित जिल्ला समन्वयन समितिका पदाधिकारी र स्थानीय तहका प्रमुख तथा उपप्रमुखसँग व्यापक छलफल भएको जनाइएको छ ।
छलफलमा पार्टीको संगठन, महाधिवेशन, प्रदेश सरकार, जिल्ला समन्वयन समिति, स्थानीय तहद्वारा भइरहेको विकास निर्माण, प्रगति, जनआकांक्षा र जनचाहनाको सम्बोधन लगायतका विषयमा तीनै तहको पार्टी नेतृत्व तथा समन्वयन सहकार्यको वातावरण बारे व्यापक छलफल भएको सदस्य राजकिशोर यादवले बताए ।
बैठकबाट स्थानीय तथा प्रदेश सरकारबाट आ–आफ्नो तह र स्तरमा आफू र आफ्नो समन्वयन एवं सहकार्यमा र सहयोगले कामकारवाही अगाडि बढाउने निर्देशन समेत दिइएको पार्टी संयोजक महेन्द्र राय यादवले जानकारी दिए ।
चार दिनसम्म चलेको बैठकमा उठेको विषय जिज्ञासा, र प्रश्नहरुको सम्बन्धमा र बैठक बाँकी हुन रहेको प्रदेशमा उठ्न सक्ने प्रश्नहरुलाई सम्बोधन गर्दै आगामी १७ गते पछि बस्ने अध्यक्ष मण्डलको बैठकबाट नै विस्तृत निर्देशन सहित निर्णय गरिने जानकारी गराइएको छ ।
यसैगरि फागुन १४ गते प्रदेश २ को राजधानी विराटनगर, फागुन १६ गते प्रदेश नं. ५ को भैरहवा, बाँके, दाङ्ग र बर्दियामा नेता कार्यकर्ता तथा सांसदसँग छलफल गर्ने समेत जनाइएको छ ।
काम गर्न नसकेका मन्त्रीलाई फिर्ता बोलाउन माग
राष्ट्रिय जनता पार्टी (राजपा) नेपालका प्रदेश सांसदहरुले प्रदेश २ को सरकारमा रहेको मन्त्रीलाई फिर्ता बोलाउन दवाव दिएका छन् । मन्त्रीहरु जिल्ला अनुसार विभाजन भएको र मन्त्रालय सञ्चालन गर्न नसकेको भन्दै राजपाकै सांसदले राजपा अध्यक्ष मण्डललाई मन्त्री फिर्ता बोलाउन दबाब दिएका हुन् ।
राजपाका केन्द्रीय अध्यक्ष मण्डल तथा प्रदेश २ का मन्त्री एवं सांसद सहभागी उक्त बैठकमा प्रदेश सरकारको समीक्षा गर्दा वर्ष दिन वितिसक्दा समेत पार्टीका मन्त्रीहरुले उल्लेख्य प्रगति गर्न नसकेको भन्दै सांसदले मन्त्रीको आलोचना गरेका छन् ।
राजपाका केन्द्रीय अध्यक्ष मण्डल सहभागि बैठकमा सांसदहरुले प्रदेश २ का उद्योग, पर्यटन, वन तथा वतावरण मन्त्री रामनरेश राय र समाजिक विकास मन्त्री नवल किशोर साहको कार्य सम्पादनमाथि प्रश्न उठाएका छन् ।
राजपाका केन्द्रीय अध्यक्ष मण्डलका संयोजक महेन्द्र राय, सदस्यहरु महन्थ ठाकुर, राजेन्द्र महतो, शरतसिंह भण्डारी, अनिल झा र राजकिशोर यादव सहभागी कार्यक्रममा राजपाका प्रदेश सांसदले भौतिक पुर्वाधार विकास मन्त्री जितेन्द्र सोनलको काम सम्मानजनक भए पनि राजपाका दुई मन्त्रीको आलोचना गरेको बैठकमा सहभागी सांसदले बताए ।
सरकारको काम प्रभावकारी बनाउन, मधेस आन्दोलनको उदेश्य र शहीदको सपना पूरा गर्न सरकारको विकल्प नरहेको बताउदै सांसदले रामनरेश राय र नवल किशोर साहलाई फिर्ता बोलाउन अध्यक्ष मण्डललाई सुझाव दिएका छन् ।
सरकारमा रहेका राजपाका मन्त्रीहरु मध्ये जितेन्द्र सोनलले पार्टीको प्रतिष्ठा बचाए पनि रामनरेश राय र नवल किशोर साहले पार्टीको नाम बदनाम गरेको सांसदहरुले आरोप लगाएका थिए ।
समाजिक विकास मन्त्री साहले गत आर्थिक वर्षको बजेट फ्रिज गराएर हालसम्म कार्यविधि समेत नबनाएका कारण मन्त्रलायको काम अगाडि बढन नसक्दा मन्त्रालय पछाडि परेको सांसदको आरोप छ । यस्तै उद्योग, पर्यटन, वन तथा वतावरण मन्त्री रामनरेश रायले कानुन बनाउन नसकेको, कार्यविधि बनाउन नसकेका कारण मन्त्रालयको योजना सञ्चालन गर्न अख्तियारी नगएको भन्दै आलोचना भएको हो ।
बैठकमा पार्टीलाई असफल बनाउने मन्त्रीलाई सम्मान जनक बिदाई गरि अन्य सांसदलाई मन्त्रालयको जिम्मेवारी दिन सांसदले माग गरे । राजपाका सांसदहरु बाबुलाल साह, मनिष सुमन, रमेश पटेल, जानकी शरण साह, परमेश्वर साहले दुई मन्त्रीको कार्यशैली प्रति असन्तुष्टि जनाएका हुन् ।
भर्खरै
लोकप्रिय
