स्पेनिस ला लिगा फुटबल अन्तर्गत आइतबार राति भएको खेलमा लिग लिडर बार्सिलोना पहिलो हाफमा पछि परेर पनि विजयी भएको छ । घरेलु मैदानमा भएको खेलमा बार्सिलोनाले एलाभेसलाई २–१ ले हराएको हो ।
२३ औँ मिनेटमा जोन गुडेट्टीले गोल गरेपछि पहिलो हाफमा एलाभेसले १–० अग्रता लियो । लिभरपुलबाट यहि जनवरीमा क्लबको कीर्तिमानी मूल्यमा बार्सिलोना आएका फिलिप कोन्टिन्होले यो खेलमा क्याटलान क्लबबाट ला लिगामा डेब्यु गरे ।
पहिलो हाफमा पछि परेको घरेलु टोली बार्सिलोनाले दोस्रो हाफमा दुई गोल गर्यो र नतिजा आफ्नो पक्षमा पा रर्यो । ७२ औँ मिनेटमा लुइस स्वारेजले बार्सिलोनाका लागि बराबरी गोल फर्काए ।
खेल सकिन ६ मिनेट बाँकी हुँदा लियोनल मेस्सीले गोल गर्दै बार्सिलोनालाई महत्वपूर्ण जित दिलाए । जितपछि शीर्ष स्थानको बार्सिलोनाको २१ खेलबाट ५७ अंक भएको छ । उ दोस्रो स्थानको एथ्लेटिको मड्रिड भन्दा ११ तथा चौथो स्थानको रियल मड्रिड भन्दा १९ अंकले अघि रहेको ।
ला लिगा अन्तर्गत आइतबार राति नै भएका अरु खेलमा एथ्लेटिको मड्रिडले लास पालमसलाई ३–० तथा लेगानेसले स्पानियोललाई ३–२ ले हरायो । सेभिल्ला र गेटाफेले १–१ को बराबरी खेल्दै अंक बाँडेका छन् । 
भर्खरै
लोकप्रिय
