काठमाडौँ – कणार्ली प्रदेश तथा देशका पश्चिम क्षेत्रमा अत्यावश्यक औषधिको अभाव देखिएको भन्दै सांसदले सरकारले ध्यानाकर्षण गराएका छन् ।
संसदको राज्इको निर्देशक सिद्धान्त, नीति र दायित्वको कार्यान्वयन, अनुगमन तथा मूल्यांकन समितिको बैठकमा सांसदहरुले स्वास्थ्य मन्त्री उपेन्द्र यादवको ध्यानाकर्षण गराएका हुन् । स्वास्थ्य मन्त्रालयले देशभर स्वास्थ्य क्षेत्रमा गरेका काम र भइरहेका प्रयासबारे छलफल गर्नका लागि समितिले उपप्रधानमन्त्री समेत रहेका स्वास्थ्य मन्त्री यादवलाई बोलाएको हो ।
बिहीबारको बैठकमा नेकपाका सांसद कालीबहादुर मल्लले कर्णालीसहितका क्षेत्रमा अत्यावश्यक औषधिकै अभाव रहेको बताएका हुन् । उनले मन्त्री यादवको ध्यानाकर्षण गराउँदै भने, ‘गाउँ गाउँका स्वास्थ्य संस्थामा औषधि छैन । तल गोदाममा पनि औषधिको अभाव छ ।’ उनले बैठकमा भने, ‘मौसम परिवर्तन हुँदैछ । अब महामारीको जोखिम उच्च हुन्छ । समयमै औषधिको व्यवस्था गर्न सकिएन भने भयावह अवस्था आउन सक्छ । सरकार चाँडै सचेत बनोस् । औषधिको व्यवस्था होस्।’
सांसद मल्लले स्वास्थ्य बिमा कार्यक्रमलाई प्रभावकारी बनाउन आग्रह गरे । बिमा कार्यक्रम तिलगंगा आँखा अस्पतालमा पनि लागु हुनु पर्ने उनले माग गरेका छन् ।
नेकपाका सांसद भीम रावलले पैसा हुँदा पनि औषधिको व्यवस्था गर्न किन नसकिएको भनेर मन्त्री यादवसँग प्रश्न गरे । उनले भने, ‘औषधि अभाव रहेका खबर आएका छन् । निःशुल्क औषधिको पैसा हुँदा पनि किन औषधि पुगेको छैन ?’ यस्तै नर्सिङ्ग अध्ययन गरेकाहरुले काम नपाउने र पाए पनि सेवा–सुविधा निकै कमजोर हुने गरेको गुनासो आएकाले यसमा पनि मन्त्रालयल सचेत हुनु पर्ने बताए ।
सांसद गणेश ठगुन्नाले मन्त्रालयले विभिन्न स्थानीय तहका लागि तय गरेको १२ सय वटा स्वास्थ्य चौकीको वितरणमा अनियमितता भएको भन्दै मन्त्री यादवको ध्यानाकर्षण गराए । आवश्यकताको आधारमा भन्दा पनि पहुँचको आधारमा स्वास्थ्य चौकीको कोटा वितरण भएको उनको भनार्य छ ।
मन्त्री यादवले बैठककाे सुरुमा मन्त्रालयले मौलिक हकको रुपमा रहेको स्वास्थ्य सेवालाई कार्यान्वयन गर्ने प्रयास भइरहेको बताए । तर कर्मचारी नभएकाले काम गर्न समस्या भएको उनको भनाई छ ।
उनले भने, ‘स्वास्थ्य संस्थामा कर्मचारी नहुँदा समस्या छ । २०५० सालदेखि कर्मचारी थपिएका छैनन् । बजेटको पनि अभाव छ । स्वास्थ्यमा ४.४ प्रतिशत मात्रै बजेट छ । उपकरणको अभाव छ ।’
उनले प्रदेशमा स्वास्थ्य विज्ञान प्रतिष्ठान र विशिष्टिकृत अस्पताल बनाउने योजनामा काम भइरहेको भने बताए । यस्तै देशका सात अस्पताललाई सुदृढिकरण गर्ने तयारी रहेको पनि जानकारी दिएका छन् । कोशी अञ्चल अस्पताल, नारायणी अस्पताल, भरतपुर अस्पताल, भेरि अस्पताल र डडेलधुरा अस्पतालमा सुदृढिकरणको काम काम सुरु भएको उनले बताए ।
भर्खरै
लोकप्रिय
