पेरिस सेन्ट–जर्मेन (पिएसजी) फ्रेन्च लिग कप फुटबलको फाइनलमा प्रवेश गरेको छ । तर यो खेलमा युवा स्टार खेलाडी केलियन एमबाप्पे रातो कार्ड खाँदै मैदानबाट बाहिरिएपछि पिएसजी १० खेलाडीमा सीमित भयो ।
अवे मैदानमा भएको खेलमा रेनलाई ३–२ ले हराएर फाइनलमा स्थान पक्का गरेको हो । ६३ औँ मिनेटमा इस्माइला सारसँग ट्याकलका लागि रेफ्रीले भिडियो एसिस्टेन्ट रेफ्री (भिएआर) को सहायताले एमबाप्पेलाई रातो कार्ड देखाएका हुन् ।
त्यस अघि नै पिएसजीका लागि थोमस मेएनिएर, काक्विनहोस र गिओवानी लो सेल्सोले गोल गरे । रेनका लागि त्यसपछि डिएफ्रा साखो र सान्जिन प्रिसिकले गोल गरे ।
यस्तै रेनका विङ्गर वाहबी खाज्रीले गोल गरेका थिए तर भिएआरको सहायताले ह्याण्डबल देखिएकाले रेफ्रीले त्यसलाई मान्यता दिएनन् ।
पिएसजीले मोनाको वा मोन्टपेलिएरसँग फाइनलमा प्रतिस्पर्धा गर्नेछ । यो खेलमा नेइमार खेलेका थिए तर उनले गोल भने गर्न सकेनन् ।
भर्खरै
लोकप्रिय
