धनगढी – नेपाली कांग्रेसकी केन्द्रीय सदस्य पुष्पा भुषालले वर्तमान सरकारले राष्ट्रिय ढुकुटीको दुरुपयोग गरिरहेको बताएकी छन् ।
१३० औं अन्तरराष्ट्रिय श्रमिक दिवसको अवसरमा ट्रेड युनियन कांग्रेस प्रदेश समितिले सुदूरपश्चिम प्रदेशको राजधानी धनगढीमा आयोजना गरेको श्रमिक सभामा नेतृ भुषालले भनिन्–‘दुई तिहाईको वर्तमान सरकार श्रमिक प्रति गम्भीर छैन, श्रमिकलाई सम्मान पनि गर्दैन ।’
‘स्वदेशमा होस् या विदेशमा होस् पसिना र रगत बगाएर नेपाली श्रमिकले पैसा कमाई रहेका छन्’ नेतृ भुषालले भनिन्–‘श्रमिकले दुख गरेर राष्ट्रिय ढुकुटीमा जम्मा भएको पैशा वर्तमान सरकार आफ्ना कार्यकर्ता खुशी पार्नमा खर्च गरिरहेको छ ।’
यो सरकारले ठूलालाई चैन र सानालाई ऐन गरिरहेको बताउँदै भुषालले वर्तमान सरकारले दुई तिहाई मतको अपमान गरेको उल्लेख गरिन ।
नेतृ भुषालले नेपाली कांग्रेसले मात्र श्रमिकको सम्मान र उनीहरुको भावना बुझ्न सक्ने बताउँदै वर्तमान सरकारका गलत गतिबिधिका विरुद्ध कांग्रेसले देश ब्यापी अभियान शुरु गर्न लागेको र त्यसमा साथ दिन मजदुरलाई आग्रह गरिन् ।
श्रमिक दिवसका अवसरमा धनगढीमा निकालिएको र्याली। तस्बिरः हिमाल जोशी/ देश सञ्चार
कार्यक्रममा मजदुर नेता सिताराम अवस्थीले मजदुरका अझै धेरै समस्या रहेका बताए । उनले वर्तमान सरकार मजदुरका समस्या समाधान गर्न गम्भीर नरहेको बताए ।
सभा अघि धनगढीको चौराहबाट प्लेकार्डसहितको मजदुरको र्याली बजार परिक्रमा गरि पार्कमोडमा सभामा परिणत भएको थियो ।
सभामा नेपाली कांग्रेस कैलालीका सभापति नरनारायण शाह, सुदूरपश्चिम प्रदेशसभाकी प्रदेश सदस्य दिब्यश्वरी शाह, नेपाल ट्रेड युनियन कांग्रेस प्रदेश अध्यक्ष शिद्धराज भट्टले शुभकामना मन्तब्य ब्यक्त गरेका थिए ।
भर्खरै
लोकप्रिय
