स्पेनिस ला लिगा फुबटबल अन्तर्गत आइतबार राति भएको खेलमा लिग लिडर बार्सिलोना अन्तिम समयमा गोल गर्न सफल हुँदै हारबाट जोगिएको छ र उसले कीर्तिमान पनि बनाएको छ ।
अवे मैदानमा भएको खेलमा बार्सिलोना स्पानियोलसँग १–१ को बराबरीमा रोकिएको हो । यो बराबरीसँग बार्सिलोनाले लिगका २२ खेलमा अपराजित रहँदै सुरुका २२ खेलमा नहार्ने क्लब कीर्तिमान बनाएको छ ।
पहिलो हाफमा गोल रहित बराबरी भएको खेलमा दोस्रो हाफमा गोल भयो । ६६ औँ मिनेटमा जेरार्ड मोरेनोको गोलबाट घरेलु टोली स्पानियोलले अग्रता लियो ।
पछि परको बार्सिलोनाका लागि ८२ औँ मिनेटमा जेरार्ड पिकेले बराबरी गोल फर्काए । यो सिजन पहिलो पटक स्टार स्ट्राइकर लियोनल मेस्सी खेलको सुरुदेखि नै मैदानमा थिएनन् । उनी सबस्टिच्युडको रुपमा पछि मात्रै मैदान आएका थिए ।
मेस्सीको फ्रि–किकमा पिकेले गोल गरेका हुन् । यो गोलले बार्सिलोनाले सन् २००९–१० को सिजनमा पेप गार्डिवलाको प्रशिक्षणमा लिगका सुरुका २१ खेलमा अपराजित रहँदै बनाएको कीर्तिमान तोडेर नयाँ कीर्तिमान बनेको हो ।
बराबरीपछि शीर्ष स्थानको बार्सिलोनाको २२ खेलबाट ५८ अंक भएको छ । राति नै भएको खेलमा भ्यालेन्सियालाई १–० ले हराएको एथ्लेटिको मड्रिड २२ खेलबाट ४९ अंकसहित दोस्रो स्थानमा छ । एथ्लेटिकोको जितमा एन्जल कोरियाले गरेको गोल नै निर्णायक बन्यो ।
अरु खेलमा जिरोनाले एथ्लेटिको बिल्बाओलाई २–० ले हरायो भने गेटाफे र लेगानेसले गोल रहित बराबरी खेल्दै अंक बाँडेका छन् ।
भर्खरै
लोकप्रिय
