पोखरा– पछिल्लो केही दिनयता लागुऔषध गिरोहलाई निशाना बनाएको कास्की प्रहरीले शुक्रबार एउटा लागुऔषध गोदाम नै बरामद गरेको छ।
पोखरा १० रामघाटस्थित एक घरलाई लागुऔषध कारोबारीले गोदाम बनाई कारोबार गर्दै आइरहेको पत्तो पाएपछि छापा मार्दा ठूलो परिमाणको लागुऔषध फेला परेको हो।
गोदामबाट कम्तिमा १२ लाख रुपैयाँ बराबरको लागुऔषध बरामद भएको जिल्ला प्रहरी कार्यालय कास्कीका प्रमुख एवं प्रहरी उपरीक्षक (एसपी) दानबहादुर कार्कीले जानकारी दिए।
कारोबारी मध्येका १८ वर्षीय डेभिड तामाङलाई समेत प्रहरीले पक्राउ गरेको छ। प्रहरी नायव निरीक्षक सन्तोष सुवेदीको कमाण्डमा खटिएको टोलीले डाइजापाम, फेनेरागन र नर्फिन गरी १ हजार ४ सय ६४ थान बरामद गरेको हो। त्यस्तै, १ सय थान नाइट्रोजन चक्की, १ सय एमएलको फेन्सिडिल ३ सय ३८ बोतल र १६ हजार ७ सय ७५ रुपैयाँ नगद बरामद गरेको एसपी कार्कीले जानकारी दिए।
पक्राउ परेका डेभिडले प्रहरीलाई बताए अनुसार आफूलाई दाइले फसाएको बताएका छन्। उनी सहित उनका दाइ र अन्य ठूलै लागुऔषध कारोबारीको संलग्नता हुन सक्ने प्रहरीको अनुमान छ। घटनाबारे थप अनुसन्धान भइरहेको प्रहरीले जनाएको छ।
कास्की प्रहरीले जेठ २९ गते लागुऔषध कारोबारीलाई नियन्त्रणमा लिन पोखरा १० रामबजारका गोविन्द थापामाथि गोली चलाएको थियो।
उनको साथबाट १५ सय थान लागुऔषध बरामद भएको थियो। उनको हाल पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पतालमा उपचार भइरहेको छ।
जेठ २९ गते नै अमरसिंहबाट ९ सय थान लागुऔषध सहित देवीकुमारी गुप्ता पक्राउ परेकी थिइन्। उनका श्रीमान् उदयकुमार गुप्ता लागुऔषध मुद्दामा कास्की कारागार छन्। श्रीमानले कारागारबाट कारोबारको सेटिङ मिलाएर श्रीमतीलाई लागुऔषध ओसारपसारमा संलग्न गराएको तथ्य फेला परेको थियो।
भर्खरै
लोकप्रिय
