लिभरपुल तेस्रो स्थानमा फर्कियो, फिरमिनो र सालहको गोल

इंग्लिस प्रिमियर लिग फुटबल अन्तर्गत आइतबार राति भएको खेलमा लिभरपुल विजयी भएको छ । अवे मैदानमा भएको खेलमा लिभरपुलले साउथह्याम्पटनलाई २–० ले हराएको हो ।

लिभरपुललाई जिताउन रोबर्टो फिरमिनो र मोहम्मद सालहले गोल गरे । दुवै गोल पहिलो हाफमा भएको हो । छैटौँ मिनेटमा फिरमिनोले गोल गर्दै लिभरपुललाई सुरुवाति अग्रता दिलाए ।

४२ औँ मिनेटमा सालहले गोल गरेपछि लिभरपुलले पहिलो हाफमा २–० को अग्रता लियो । सालहले लिभरपुलबाट यो सिजन ३६ खेलमा २९ गोल गरिसकेका छन् । उनले यो सिजन अवे मैदानमा ११ गोल गरिसकेका छन् ।

दोस्रो हाफमा दुवै तर्फबाट गोल हुन सकेन र लिभरपुल २–० ले नै विजयी भयो । जितपछि लिभरपुल तेस्रो स्थानमा फर्किएको छ । उसको २७ खेलबाट ५४ अंक भएको छ ।

चौथो स्थानमा झरेको टोटनह्यामको ५२ अंक भएको छ । रेलिगेशन जोनमा झरेको साउथह्याम्पटनको २७ खेलबाट २६ अंक रहेको छ ।