काठमाडौँ – जंगलमा रहेको तालिम केन्द्रमा बम लैजाने क्रममा बिहीबार बेलुका कैलालीको धनगढी उपमहानगरपालिका–४ सहिद गेट नजिकै बम विस्फोट भएको पाइएको छ ।
घटनामा परी बिहीबार राति मृत्यु भएका विप्लवका कार्यकर्ता रामबहादुर सिंहले तालिम दिनका लागि बम बोकेर जाँदा बाटोमै विस्फोट भएको हो । विप्लवका एक नेताले देश सञ्चारलाई दिएको जानकारीअनुसार सिंह विप्लव जनसेनाका प्रशिक्षक हुन् ।
उनले कैलाली र कञ्चनपुर जिल्लाको बीचमा पर्ने पुर्नवास नजिकैकाे जंगलमा तीन दिनदेखि सैन्य तालिम दिँदै आएका थिए । प्रशिक्षकका लागि तालिम केन्द्रमा बम लैजाने क्रममा विस्फोट भएको ती नेताले जनाए ।
‘जंगलमा सुदूरपश्चिम प्रदेशका डेढ सय युवालाई तालिम दिइँदै आएको छ’ ती नेताले देश सञ्चारलाई बताए । उनको पारिवारिक स्रोतले समेत सिंह डेढ वर्षदेखि विप्लव समूहमा निक्कै सक्रिय रहँदै आएको जानकारी दियो ।
उनी डेढ वर्षअघि उक्त समूहले काठमाडौँमा गरेको जनसभाबाट पार्टीमा प्रवेश गरेका थिए । सिंहको पारिवारिक स्रोतले भन्यो, ‘उनी विप्लव समूहमा तालिम दिने, बम बनाउने कार्यमा संलग्न रहँदै आएका थिए ।’
विप्लव समूहले घटनाको जिम्मेवारी लिदै विस्फोटमा आफ्ना कार्यकर्ता रामहादुर सिंह ‘राजेश’ काे मृत्यु भएको पुष्टि गरेको छ । पार्टीका सेती महाकाली व्युरो इन्चार्ज निर्माणले विज्ञप्ति जारी गर्दै घटनाको जिम्मा लिएका हुन् । पार्टी कामको सिलसिलामा ‘आत्म रक्षाका लागि बोकेको बम विष्फोट भएको’ विज्ञप्तिमा उल्लेख छ ।
घटनामा परी घाइते भएका लक्ष्मण सेरेला पनि विप्लवका कार्यकर्ता भएको पुष्टि भएको छ । उनी तत्कालीन माओवादी लडाकु समायोजन हुने बेला पाँच लाख रुपैयाँ लिएर बहिरगमन भएका थिए ।
कैलालीको माया मेट्रो अस्पतालमा उपचार गराइ रहेका सेरेला त्यसयता विप्लव समूहमा सक्रिय थिए ।
अस्पतालमा भेटिएकी उनीकी श्रीमती विमला सेरेलाले देश सञ्चारसँग भनिन्, ‘उहाँ एक हप्ताअघि काठमाडौँमा दाइलाई भेट्न जान्छु भनेर घरबाट निस्कनु भएको थियो। हिजो बिहान नेपालगञ्ज आइपुगें भनेर फोन गर्दै पर्सीसम्म घर आइपुग्छु भन्नुभएको। तर यस्तो घटनामा भयो।’
उनले श्रीमान् कुनै पार्टीमा आवद्ध भए नभएको बारे आफूलाई जानकारी नभएको बताइन्।
प्रहरीले घटनामा विप्लवको संलग्नता रहेको आशंका गरे पनि अनुसन्धान जारी रहेको जनाएको छ।
भर्खरै
लोकप्रिय
