सिमकोट – नाम्खा गाउँपालिकाको वडा नम्बर ६ को हिमाल पारीको गाउँ लिमीका तीन वटै बस्तीमा पहिलो पटक खानेपानीका धाराबाट पानी खसेको छ ।
यस अघि खोलाको पानी प्रयोग गर्दै आएका लिमी बासीका तीन वटै गाउँमा एक एक वटा योजना निर्माण भएर संचालनमा आएपछि लिमीबासी आधारभुत खोपानीको पहुँचमा पुगेका हुन् ।
तीन वटै गाउँका बासिन्दाहरु पहिले खोलाको पानी प्रयोग गर्न बाध्य भएको भए पनि अहिले भने घरआगन मै खानेपानीका धारा निर्माण भएर पानी झर्न थालेपछि खुसी भएका छन् ।
लिमीको रैथानेहरुले जीवनमै पहिलो पटक यसरी धाराबाट आएको स्वच्छ पानी प्रयोग गर्न पाएका हुन् । पानी धारामा झर्दा स्थानीयले खुसीयाली समेत मनाएका थिए ।
चार देखि पाँच घण्टा दूरीको फरकमा रहेका लिमीका तील, हल्जी र जाङ्ग गाउँमा खानेपानी योजनाहरु एक साथ निर्माण भएर संचालनमा आएका हुन् ।
गाउँपालिकाको मिलान कोष र ग्रामीण जलश्रोत ब्यबस्थापन परियोजनाको लगानीमा लिमीका तीन गाउँमा खानेपानी योजना सम्पन्न भएर संचालनमा आएको नाम्खा गाउँपालिकाका अध्यक्ष बिष्णु बहादुर लामाले बताए ।
यसलाई गाउँपालिकाले महत्वपूर्ण उपलब्धीका रुपमा लिएको समेत उनको भनाई छ । यस अघि नागरिकता र सिमा पास मात्र राज्यबाट सुबिधा पाउने लिमीका बासिन्दाहरुलाई यसले राज्यका सेवा र सुबिधाहरुको पहुँचमा समेत बृद्धि गर्दै लगेको मान्न सकिन्छ ।
चाङजुमा खानेपानी हल्जी, छिसेरी खानेपानी जाङ्ग र गुन्छु खानेपानी योजना तील गरि तीन वडा योजनाहरु स्थानीय उपभोक्ताहरु मार्फत निर्माण गरि संचालनमा आएको परियोजनाका जिल्ला सल्लाहकार बिरेन्द्र थापाले बताए ।
अब यी योजनाबाट तीन गाउँका १४६ घरधुरीका सात सय सात जनसंख्या प्रत्यक्ष रुपमा लावान्भित हुनेछन् । तीन वटै योजनाका लागि एक एक इन्टेक, पानी संकलन ट्याङ्की र बीस वटा धारा निर्माण गरिएको छ ।
योजनामा एक परिवारको एक जना सदस्यलाई प्रति दिन ६५ लिटर खानेपानी उपलब्ध हुने र २० बर्षसम्म टिक्ने गरि योजनाको डिजाईन तथा निर्माण गरिएको सल्लाहकार थापाले बताए ।
भर्खरै
लोकप्रिय
