काठमाडौं – आइसिसी विश्व क्रिकेट लिग डिभिजन टू क्रिकेट अन्तर्गत क्यानडासँगको खेलका लागि नेपालले टस जितेको छ । टस जितेको नेपालले पहिलो फिल्डिङ रोजेकाले केहीबेरमा क्यानडाले ब्याटिङ थाल्दैछ । विश्वकप छनौट खेल्न नेपाललाई बुधबार क्यानडालाई हराउनै पर्ने दबाब छ ।
आइसिसी विश्व क्रिकेट लिग डिभिजन टू अन्तर्गत मंगलबार भएको खेलमा नामिबियाले केन्यामाथि आठ विकेटको जित हात पारेसँगै रनरेटको आधारमा नेपाललाई पछि पार्दै नामिबिया अंक तालिकाको दोस्रो स्थानमा उक्लिएको छ ।
अन्तिम चरणको खेल बाँकी हुँदा क्यानडा, नामिबिया र नेपालको समान ६ अंक छ । तर रनरेटमा पछि रहेको नेपाल तेस्रो स्थानमा झरेको छ ।
बुधबार अन्तिम दिन हुने खेलले विश्वकप छनौटमा पुग्ने दुई टोलीको टुंगो लाग्नेछ । नेपालले बुधबार शीर्ष स्थानको क्यानडासँग खेल्दैछ भने नामिबियाले चौथो स्थानको युएइसँग खेल्नेछ ।
अब नेपालले शीर्ष दुईमा स्थान बनाउँदै वान डे वर्ल्डकप क्वालिफायरमा स्थान बनाउन क्यानडालाई हराउनै पर्नेछ । हराउन असफल भएमा नेपालको यात्रा डिभिजन टू मै यथावत रहने सम्भावना बढी हुन्छ ।
डिभिजन टू को शीर्ष दुई स्थानमा रहने टोली वर्ल्डकप क्वालिफायरमा छनौट हुनेछन् भने तेस्रो र चौथो स्थानमा रहने टोली डिभिजन टू मै यथावत रहनेछन् । अहिलेसम्म एक खेल पनि जित्न नसकेको केन्या डिभिजन टुबाट थ्री मा घटुवा भइसकेको छ ।
पहिलो खेलमा नामिबियामाथि रोमाञ्चक जित निकालेको नेपालले दोस्रो खेलमा ओमानसँग हार व्यहोरेको थियो भने तेस्रो खेलमा सोमबार युएइलाई हराएको थियो । बुधबार नेपालले जित्यो भने सोझै फाइनलसँगै विश्वकप छनौटमा स्थान पक्का गर्नेछ ।
गएको असोजमा नेपाल डिभिजन वानबाट डिभिजन टू मा घटुवा भएको थियो । क्यानडा, नेपाल र नामिबिया तीनै देशको समान ६ अंक छ । रनरेटका आधारमा नेपाल तेस्रो, नामिबिया दोस्रो र क्यानडा पहिलो स्थानमा छ ।
सम्बन्धित समाचार
डिभिजन टू क्रिकेट : नेपाल भर्सेस क्यानडा, नेपाललाई जित्नै पर्ने दबाब
भर्खरै
लोकप्रिय
