धनगढी-सुदूरपश्चिम प्रदेशको पहाडी जिल्ला बैतडीमा पहिरोको उच्च जोखिममा रहेका ५ परिवारलाई सुरक्षित स्थानमा स्थान्तरण गरिएको छ।
जिल्लाको सुर्नया गाउँपालिका–८ मल्लोढोलेका पहिरो प्रभावित परिवारलाई सुरक्ष दिन पहिरोको जोखिम नभएका छिमेकी परिवारमा बस्ने व्यवस्था मिलाईएको हो।
घर नजिकै सडक भत्किदा पहिरो खसेपछि उच्च जोखिममा ५ परिवारलाई छिमेकीको घरमा सारिएको सुर्नया गाँउपालिका– ८ का वडा अध्यक्ष आनन्दसिंह बोहराले बताए।
उनका अनुसार सुर्नया गाउँपालिका कै वडा नम्बर ६ मा रहेको शंकरपुर प्रहरी चौकी, जनप्रतिनिधि र स्थानीयहरुको सहयोगमा प्रभावित परिवारलाई सुरक्षित ठाउँमा सारिएको हो। सतबाँझ–श्रीभावर सडक खण्ड अन्तर्गत ढोल्यामोडबाट वडा कार्यालयसम्म काटिएको सडकमा पहिरो खस्दा २३ परिवार जोखिममा रहेका छन्।
भिरालो जमिन भएकाले सडकमा खनिएको माटो र पहिरोका कारण बस्तीमा समस्या निम्त्याएको वडा अध्यक्ष बोहराले बताए। पहिरोले स्थानीयहरुको खेतबारीमा नोक्सानी भएको छ भने खानेपानीको मुहान र पाइपसमेत पहिरोले पुरीएका छन्।
पहिरोका कारण गाउंमा खानेपानीको समेत अभाव भएको स्थानीयहरुले बताएका छन्।
भर्खरै
लोकप्रिय
