दक्षिण अफ्रिकाका राष्ट्रपति ज्याकोब जुमाले तत्काल कार्यान्वयन हुने गरी राजीनामा दिएका छन् । जुमाकाले स्थानीय समय अनुसार बुधबार बेलुका राष्ट्रिय टेलिभिजनबाट प्रशारित सम्बोधनको क्रममा राजीनामाको घोषणा गरेका हुन् ।
जुमाले आफ्नै पार्टी एएनसीको दबाबमा राजीनामा दिएका हुन् । एएनसीले जुमालाई राजीनामाका लागि बिहीबारसम्मको समय दिएको थियो । नभए संसदमा अविश्वासको प्रस्ताव लैजाने एएनसीले जनाएको थियो । तर जुमाले बुधबार बेलुका नै राजीनामाको घोषणा गरे ।
७५ वर्षका जुमाले राजीनामा दिएपछि अब अहिलेका उपराष्ट्रपति सिरिल रामापोसा राष्ट्रपति बन्ने सम्भावना छ । उनलाई एएनसीले आफ्नो पार्टी प्रमुख बनाएको छ । सन् २००९ देखि सत्तामा रहेका जुमामाथि भ्रष्टाचारका एक भन्दा बढी आरोप लागेको छ ।
राजीनामाको घोषणाका लागि गरेको लामो भाषणको क्रममा एएनसीले आफूमाथि गरेको व्यवहार ठीक नरहेको उनको भनाई छ ।
उनले आफूले अविश्वास प्रस्तावको भयले राजीनामा नदिएको बताएका छन् । पार्टी भित्र आएको विभाजनका कारण आफूले राजीनामा दिएको उनको भनाई छ ।
भर्खरै
लोकप्रिय
