हुम्ला – हुम्लाका सातवटै गाउँपालिकाहरुले आर्थिक वर्ष सम्पन्न भएको एक महिना बितिसक्दा पनि आर्थिक विवरणसहितको खर्चको फाँटबारी कोष तथा लेखा नियन्त्रण कार्यालयमा बुझाएका छैनन् ।
प्रगति विवरण बुझाउने प्रर्णालीमा गाउँपालिका नजानु र आर्थिक वर्ष सकिने बित्तिकै जिम्मेवार कर्मचारी जिल्ला बाहिर निस्कनुले आर्थिक विवरण तथा खर्चको फाँटबारी नबुझाएका हुन् ।
आर्थिक वर्ष सम्पन्न भएको दुई हप्ता भित्र खर्चको फाँटबारी र आर्थिक विवरण कोष तथा लेखा नियन्त्रण कार्यालयमा पेश गर्नु पर्ने नियम भए पनि हालसम्म नबुझाएको कोष प्रमुख राजन रेग्मीले बताए । निर्धारित समयमा नियमानुसार बुझाउनु पर्ने प्रगति विवरण नबुझाए पछि तीन दिने परिपत्र पुनः गरिएको थियो ।
स्थानीय सरकार स्वायत्त भए पनि नियमानुसार बुझाउनु पर्ने खर्चको फाँटबारी र आर्थिक विवरण नबुझाउँदा हुम्ला जिल्लामा आर्थिक वर्ष ०७५–०७६ मा वास्तविक खर्च कति भयो र १२ नम्बरको फारम भर्न पनि समस्या भएको छ । गाउँपालिकाले खर्चको विवरण नबुझाउँदा पालिकामा निकासा गएको रकम सबै खर्च मान्नु पर्ने अवस्था भएको तर उनीहरुको खातामा पैसा रहेको जानकारी आएको कोलेनिकाले जनाएको छ ।
गाउँपालिकालाई पत्राचार गरेर विवरण उपलब्ध गराउन अनुरोध गरे पनि नमान्दा पालिका अध्यक्ष तथा उपाध्यक्षलाई जानकारी गराएको प्रमुख रेग्मीले बताएका छन् । यस विषयमा गाउँपालिकासँग बुझ्दा तयार हुँदैछ भन्ने मात्र जबाफ आउने गरेको छ । त्यो तयार भने कहिले हुने हो यसै भन्न सकिने अवस्था छैन ।
गाउँपालिकाहरुले आर्थिक विवरण र खर्चको फाँटबारी नबुझाएपछि कुनै पनि गाउँपालिकालाई निकासा नदिएको प्रमुख रेग्मीले बताए । महालेखाबाटै लिखित शर्तका रुपमा नै आर्थिक विवरण नबुझाउँदा प्रथम चौमासिकको निकासा नदिनु भन्ने आएको कारण कोष कार्यालयबाट निकासा रोकिएको छ ।
सबै विवरण बुझाएको भए साउन २८ गते प्रथम चौमासिक निकासा दिनु पर्ने व्यवस्था छ तर शर्त नै कडी कडाउ आएको कारण निकासा रोकिएको र गाउँपालिकाबाट ती दुवै विवरण नआउँदासम्म निकासा नदिने प्रमुख रेग्मीले बताए । आफ्नो आन्तरिक श्रोत भएका गाउँपालिकाले तलब भत्ता खान पाउने अन्यथा त्यो पनि सम्भव नभएको रेग्मीले बताए ।
भर्खरै
लोकप्रिय
