सिमकोट-घाँस काट्ने क्रममा भिरबाट लडेर गम्भिर घाईते भएकी एक जना महिलालाई उपचारका लागि काठमाडौँ पठाइएको छ।
टाउको र छातीमा गहिरो चोट लागेपछि ताँजाकोट गाउँपालिका वडा नम्बर १ काँडागाउँबाट हेलिकोप्टरमार्फत उपचारका लागि जिल्ला अस्पताल ल्याइएकी खिउरा खड्कालाई जिल्ला अस्पतालले जिल्लामा उपचार गर्न नसकिने भन्दै काठमाडौँ रिफर गरिएको हो।
काँडा गाउँकी स्थानीय बासिन्दा ४३ बर्षीया खड्का घाँस काट्ने क्रममा लडेर घाईते भएको अवस्थामा हेलिकोप्टरबाट उद्धार गरी जिल्ला अस्पताल पुर्याइएको आफन्त छक्कीलाल खड्काले बताए। घाइते खड्का बोल्न र खाना खान सक्ने अवस्थामा छैनन्।
घाइतेको टाउकोमा घाउ धेरै ठूलो भएकोले घाउ सफा गर्ने र प्रारम्भिक उपचार गर्ने कार्य जिल्ला अस्पतालमा भएको डाक्टर दुर्गा सुर्खालीले बताए।
सबै कुरा हेर्न जिल्लामा नसकिने भएपछि बिरामीलाई सिधै काठमाडौँको वीर अस्पताल रिफर गरिएको हो।
बिरामीको अवस्था निक्कै जटिल भएको कारण जिल्लामा हेर्न नसकिने भएपछि काठमाडौँ रिफर गरिएको अस्पतालले जनाएको छ। घाईते खड्काले स्वास्थ्य बिमा गरेकोले उपचारमा केही सहज हुनेछ।
भर्खरै
लोकप्रिय
