एजेन्सी-भारतीय अन्तरिक्ष संस्थान इसरोका वैज्ञानिकले चन्द्रयान-२ लाई चन्द्रमाको सबैभन्दा तल्लो ओर्बिटमा स्थापित गराएका छन्। १ सेप्टेम्बर आईतवारका दिन जम्मा ५२ सेकेण्डको प्रयासमा वैज्ञानिकले यो सफलता पाएका हुन।
अब चन्द्रमा र चन्द्रयान-२ बीचको दुरी ११९ देखि १२७ किमी मात्रै बाँकी छ। इसरोले यस कार्यका लागि चन्द्रयान-२ को इन्जिन बेलुकी ६ बजेर २१ मिनेट जांदा प्रज्वलित गरेका थिए।
जम्मा ५२ सेकेण्डको अन्तरालमा चन्द्रयानलाई चन्द्रमाको झनै तल्लो ओर्बिटमा स्थापित गराएर यानको इन्जिन बन्द गरिएको थियो। अहिले चन्द्रयान-२ चन्द्र सतहदेखि ११९X१२७ किमी माथिल्लो ओर्बिटमा रहेर चन्द्र परिक्रमा गरीरहेको छ।
इसरोले जारी गरेको विज्ञप्तिअनुसार भोली २ सेप्टेम्बरका दिन दिउँसो १२ बजेर ४५ मिनेट देखि १३ बजेर १५ मिनेटका बीचमा ओर्बिटर र ल्याण्डर विक्रमलाइ बेग्ला बेग्लै गरिने छ।
ओर्बिटरबाट बेग्लै भएपछि ल्याण्डर विक्रमले चन्द्र धरातल अवतरणका लागि तरखर गर्नेछ भने ओर्बिटर अर्को एक वर्षसम्म यसै उचाईबाट चन्द्र परिक्रमा गरीरहने छ।
ल्याण्डर विक्रमले ७ सेप्टेम्बरमा चन्द्र धरातल टेक्नुभन्दा पहिला चन्द्रमाका बिभिन्न ओर्बिट पार गर्दै अघि बढ्नु पर्ने हुन्छ। २ सेप्टेम्बरमा ओर्बिटरबाट ‘अनडक’ गरिएपछि ल्याण्डर विक्रमलाई ३ सेप्टेम्बरको बिहान ९-१० का बीच १०९x१२० किमीको ओर्बिटमा झारिने छ।
एकदिनसम्म यसै उचाईबाट चन्द्र परिक्रमा गरीरहेको ल्याण्डर विक्रमलाई पुनः ४ सेप्टेम्बरको बिहान ३-४ को बीचमा ३६X११० किमीको ओर्बिटमा स्थापित गरिनेछ।
७ सेप्टेम्बरको दिन प्रारम्भ हुनसाथ ल्याण्डर विक्रमको इन्जिन प्रज्वलित गरी यसलाई अति कम गतिमा सीमित राखेर ७ सेप्टेम्बर कै बिहान १बजेर ३० मिनेटदेखि २ बजेर ३० मिनेटका बीच चन्द्रमा सूर्योदय भएको लगत्तै अवतरण गराइने छ।
भर्खरै
लोकप्रिय
