बार्सिलोनालाई चेल्सीको सन्देश–हामी तयार छौँ

चेल्सी एफए कप फुटबलको क्वाटरफाइनलमा प्रवेश गरेको छ । पाँचौँ चरण अन्तर्गत शुक्रबार राति भएको खेलमा हल सिटीलाई ४–० ले हराउँदै चेल्सीले अन्तिम ८ मा स्थान पक्का गरेको हो ।

घरेलु मैदानमा भएको खेलमा चेल्सीले चारै गोल पहिलो हाफमै गरेको हो । उसका लागि विलियनले दुई गोल गरे भने पेड्रो र ओलिभर जिरउडले एक एक गोल गरे । दोस्रो मिनेटमा नै विलियनले गोल गर्दै सुरुवाति अग्रता दिलाएका हुन् ।

२७ औँ मिनेटमा पेड्रोले अग्रता दोब्बर पारे । ३२ औँ मिनेटमा विलियनले व्यक्तिगत दोस्रो गोल गरेपछि चेल्सीको अग्रता ३–० मा पुग्यो । ४२ औँ मिनेटमा जिरउडले गोल गरे । उनले जनवरीमा आर्सनलबाट चेल्सी आएपछि पहिलो गोल गरेका हुन् ।

दोस्रो हाफमा दुवै तर्फबाट गोल हुन सकेन र चेल्सी ४–० ले विजयी भयो । आउँदो मंगलबार चेल्सी च्याम्पियन्स लिगको अन्तिम १६ को पहिलो लेगमा बार्सिलोनासँग खेल्दैछ ।

बार्सिलोनासँगको खेलअघि चेल्सीले शानदार जित निकाल्दै आफू तयार रहेको सन्देश दिएको छ । यस्तै शुक्रबार राति नै भएको खेलमा शेफिल्ड युनाइटेडलाई १–० ले हराए लेस्टर सिटीले पनि अन्तिम ८ मा स्थान पक्का गरेको छ । लेस्टरको जितमा जेमी भर्डीले ६६ औँ मिनेटमा गरेको गोल नै निर्णायक बन्यो ।