कोहलीबाट सावधान !

अ +

अ

अ -

खेल : ६
औसत रन : १८६
कुल रन : ५५८
शतक : ३

यो आंकडा हो, भारतीय क्रिकेट टिमका कप्तान विराट कोहलीले दक्षिण अफ्रिकासँगको एक दिवसीय क्रिकेट श्रृङ्खलामा बनाएको छ ।

दक्षिण अफ्रिकाको भूमिमा पहिलो पटक एक दिवसीय श्रृङ्खला जितेर इतिहास बनाउने क्रममा भारतका कप्तान कोहलीले पनि इतिहास बनाए । जितमा उनको भूमिका महत्वपूर्ण रह्यो, यो कुरा आंकडाले पनि देखाउँछ ।

कोहलीको ब्याटिङको दबदबा यहाँसम्म रह्यो कि यो सिरिजमा धेरै रन बनाउने खेलाडीको सूचिमा दोस्रो स्थानमा रहेका शिखर धवन र कोहलीबिचको फरक २३५ रनको छ ।

धवनले ६ खेलमा एक शतकको मद्दतमा ३२३ रन बनाए ।

कोहलीको मनको कुरा

शुक्रबार भएको अन्तिम एक दिवसीय खेल जितेपछि क्रिकेट कमेन्टेटर्सदेखि फ्यान सबै म्यान अफ दि म्याच तथा म्यान अफ दि सिरिज कोहलीको प्रशंसा गरिरहेका थिए ।

तर कोहलीले भने यो शानदार जितको श्रेय श्रीमती अनुष्का शर्मालाई दिए । कोहली र अभिनेत्री शर्माबिच गएको डिसेम्बरमा विवाह भएको थियो ।

दक्षिण अफ्रिकाको सेन्चुरियनमा भएको एक दिवसीय क्रिकेटपछि कोहलीले भने ‘मैदान बाहिर रहेर जसले सहयोग गरे उनीहरुलाई जितको श्रेय मिल्नु पर्छ । मेरी श्रीमतीले लगातार हौसला बढाइन् । उनलाई यसको श्रेय मिल्नु पर्छ । अतितमा उनको धेरै आलोचना भयो । यो समयमा जब अवस्था मुश्किल थियो, उनले मलाई अघि बढ्नका लागि लगातार सहयोग गरिन् । यसका लागि म आभारी छु ।’

अनुष्कासँगको बिहेपछि कोहलीको यो पहिलो क्रिकेट भ्रमण हो ।

थियो मुश्किल चुनौती

कोहलीका लागि दक्षिण अफ्रिकाको यात्रा सजिलो थिएन । उनको टिमले टेस्ट श्रृङ्खला २–१ ले गुमाएको थियो । पहिला दुई टेस्टमा भोगेको हारका लागि कप्तानको रुपमा कोहलीले लिएको निर्णयको आलोचना भएको थियो ।

इतिहास पनि उनको साथमा थिएन । भारतले यसअघि दक्षिण अफ्रिकामा एक दिवसीय श्रृङ्खला जितेको थिएन । तर इतिहासले बाटो परिवर्तन गर्ने र कोहलीलाई त्यसको माध्यम बनाउने सोचेकै हुनु पर्छ ।

कोहलीले टिमको जिम्मेवारी लिए । उनले ६ खेलमा तीन पटक शतक बनाए । डरबनमा भएको पहिलो एक दिवसीयमा कोहलीले ११२ रन बनाएर टिमलाई जित मात्रै दिलाएनन्, दक्षिण अफ्रिकालाई लिएर बनेको डर पनि हटाए ।

आइसिसीको र्‍याङ्किङमा दोस्रो नम्बरमा रहेको भारत पहिलो स्थानमा पुग्यो । लगातार तीन खेलमा जित, चौथो खेलमा हार अनि फेरि लगातार दुई खेलमा जितले भारतलाई पहिलो स्थानमा पुर्‍यायो ।

प्रशिक्षकको नजर

प्रशिक्षक रवी शास्त्रीले दक्षिण अफ्रिकाको भूमिका बनाएको इतिहासको पूरै श्रेय कप्तान कोहलीलाई दिनु पर्ने बताए ।

शास्त्रीले भने ‘कप्तानलाई पूरै श्रेय दिनुपर्छ । उनको प्रदर्शन निकै उच्च रह्यो । उनलाई हेरेर टिमका अरु खेलाडीले पनि आफूलाई त्यहि स्तरमा पु¥याउने सोच राख्नु पर्छ ।’ तर कोहली आफ्नो प्रदर्शनबाट खुशी रहे पनि श्रेय पूरै टिमलाई दिनु पर्ने बताए ।

सही निर्णय, शानदार जित

टेस्ट श्रृङ्खलामा आलोचना खेपेका कोहलीको एक दिवसीयमा निकै प्रशंसा भयो । उनले सही टिम चुने र बलरको राम्रो प्रयोग गरे । उनले अनुभवी तथा पूर्व कप्तान महेन्द्र सिंह धोनीसँग राम्रो सल्लाह लिए ।

कोहलीको सही निर्णयले कुलदीप यादव र युजवेन्द्र चहलको रुपमा भारतले दुई नयाँ स्पिन स्टार पायो । ६ खेलमा १३.८८ को औसतमा कुलदीपले १७ विकेट लिए । यस्तै यस्तै चहलले १६.३७ को औसतमा १६ विकेट लिए । कोहलीले दुवै खेलाडीको निकै तारिफ गरेका छन् ।