झापा – ‘यो चियामा हाल्ने विषादी हो’ भन्दै जमिन मुनी जुटको बोरामा हालेर गाडेर राखेको ठूलो परिमाणको विस्फोटक पदार्थ ‘नियो जेल’ नेपाल प्रहरीले बरामद गरेको छ।
आइतबार साँझ जिल्ला प्रहरी कार्यालय झापा तथा इलाका प्रहरी कार्यालय अनारमनीको संयुक्त टोली उक्त परिमाणको विस्फोटक पदार्थ अर्जुनधारा नगरपालिका १ सिस्नेबाट बरामद गरेको हो।
बरामद गरिएको विस्फोटक पदार्थ नेत्रविक्रम चन्द ‘विप्लव’ नेतृत्वको नेकपाका कार्यकर्ताले राखेको जिल्ला प्रहरी कार्यालय झापाका प्रहरी नायब उपरीक्षक महेन्द्रकुमार श्रेष्ठले सोमबार आयोजित पत्रकार सम्मेलनमा जानकारी दिए।
प्रहरीका अनुसार बमका लागि आवश्यक ‘हाइ एक्सप्लोसिभ’ बरामद भएको इलाका प्रहरी कार्यालय अनारमनीका प्रमुख प्रहरी नायव उपरीक्षक मोहन थापाले जानकारी दिए। बरामद गरिएको विस्फोटक पदार्थ इलाका प्रहरी कार्यालय अनारमनीमा राखिएको छ।
थापाले भने, ‘बरामद गरिएको विस्फोटक पदार्थमा बम बनाउन प्रयोग हुन्छ।’ जिल्लामा श्रंखलावद्ध रूपमा बम विस्फोटका घटना हुन थालेपछि प्रहरीले विप्लवका जिल्ला सेक्रेटरी इलाम माङ्सेबुङ गाउँपालिका–१ का ३४ वर्षीय प्रवीण मिश्र ‘मनिष’, जिल्ला सदस्य हल्दीवारी गाउँपालिका–५ का ४४ वर्षीय टीका पोखरेल र मकवानपुर भिमफेदी गाउँपालिका–२ का २६ वर्षीय अनुल सारु मगरलाई पक्राउ गरेको थियो।
उनीहरूकै बयानको आधारमा अर्जुनधारामा भण्डारण गरी राखिएको विस्फोटक पदार्थ बरामद गरेको प्रहरीले जनाएको छ।
भर्खरै
लोकप्रिय
