सिमकोट– हुम्ला जिल्लाको अर्गानिक स्थानीय बाली चिनोबाट बिस्कुट उत्पादन गरेर बजारमा ल्याइएको छ।
सोवर्ण खाद्य उद्योगले स्थानीय अन्नपातको आधुनिक परिकार बनाउने क्रममा पहिलो पटक चिनोको बिस्कुट उत्पादन गरेर बजारमा ल्याएको हो।
पहिलो लटमा तीन सय प्याकेट चिनोको बिस्कुट उत्पादन गरेर सिमकोट र काठमाडौँकाे बजारमा पठाएको र बजारको बिक्रीको अवस्था राम्रो भएको पाइएको उक्त उद्योगमा म्यानेजर मुकुन्द रोकायाले बताए।
बिस्कुट चिनोको चामल स्थानीय गहुँको पिठो, बटर र पाउडर मिलाएर तयार गरिएको छ। म्यानेजर रोकायाका अनुसार एक प्याकेटमा दश पिस बिस्कुट हुने र मुल्य ६५ रुपियाँ निर्धारण गरिएको छ।
स्थानीय अर्गानिक कच्चा पदार्थबाट उत्पादन भएकोले बिस्कुट स्वास्थ्यका दृटिले पनि राम्रो हुने सेवाग्रीहरुले बताउने गरेका छन्। सबै कच्चा पदार्थ स्थानीय अर्गानिक भएको र चिनो मधुमेह रोगका बिरामीहरुको औषधी पनि हुने भएको कारण यसको खपत राम्रो हुन थालेको उद्योगले जनाएको छ।
काठमाडौँ र हुम्लाका बेकरीहरुमा उक्त बिस्कुटको थप माग आइरहेको र सोमबार बिस्कुट उत्पादन गरिने रोकायाले बताए। हुम्लामा चिनोको उत्पादन राम्रो हुने गरेको छ।
भर्खरै
लोकप्रिय
