श्रीमानले घरबाट निकाले, जंगलमा अलपत्र परेकी महिलाको उद्धार

धनगढी – महिला हिंसाविरुद्धको १६ दिने अभियान सञ्चालन भइरहेका बेला कैलालीमा श्रीमानबाट एक महिला घर निकाला भएकी छन् । घर निकाला भएर अलपत्र परेकी ती महिलालाई सोमबार राति जंगलबाट उद्धार गरिएको हो ।

कैलालीको गोदावरी नगरपालिका–६ घर भएकी ती महिलाले श्रीमानले घर निकाला गरेको बताएकी छन् । उनी गोदावरी नगरपालिकाकै वडा नम्बर–४ मा रहेका खैरानाको बिच जंगलमा अलपत्र अवस्थामा भेटिएकी उद्धारमा संलग्न सेस विष्टले बताए ।

अन्दाजी २४–२५ वर्षकी उनले आफू श्रीमानबाट पीडित भएको बताइरहेकी सोही स्थलमा भएका सामाजिक विकास मन्त्री कृष्णराज सुवेदीका स्वकिय सचिव समेत रहेका विष्टले बताए ।

रातिको पौने ९ बजे बिच जङ्गलमा भेटिएकी उनीलाई उद्धार गरी इलाका प्रहरी कार्यालय मालाखेती, अत्तरियाको जिम्मा लगाइएको विष्टले बताए ।