पोखरा– पोखरामा भइरहेको आठौँ नेपाल साहित्य महोत्सवमा नारायण ढकालको कथा कृति ‘तमस’ विमोचन भएको छ। लेखकद्वय खगेन्द्र संग्रौला र गनेस पौडेलले पुस्कतको संयुक्त रुपमा विमोचन गरे।
नेपाली समाजको विभिन्न घटनाक्रमलाई कथामा बुनेको कृतिका लेखक नारायण ढकालले बताए। ‘पञ्चायतदेखि गणतन्त्रसम्मको नेपाली परिवेशसँग जोडिएका घटनालाई मैले पुस्तकमा प्रस्तुत गरेको छु’, उनले भने, ‘वस्तुपरक कथा धेरै छन्।’
मनपर्ने ठाउँ पोखराबाट पुस्तक विमोचन गर्न पाउँदा खुशी लागेको उनले बताए। पुस्तक बजारमा आइसकेपछि पाठकले दिने प्रतिक्रियालाई सम्मान गर्ने लेखक ढकालले सुनाए। पुस्तकमा १३ वटा कथा संगृहीत छन्।
पुस्तक विमोचनअघि लेखक तथा कथा संग्रहका बारेमा लेखकद्वय खगेन्द्र संग्रौला र गनेस पौडेलले धारणा राखेका थिए। ढकालले विगतको लेखन शैलीलाई कायम राख्दै नयाँ कृतिमा केही नयाँ शैली अपनाएको लेखक पौडेलले सुनाए।
लेख्ने व्यक्ति आफैमा प्रगतिशील हुने हुँदा ढकालको नयाँ कृतिले साहित्य क्षेत्रमा थप योगदान दिएको लेखक पौडेलको भनाइ थियाे। अर्का लेखक खगेन्द्र संग्रौलाले कृतिकार ढकालको आनीबानी र विगतका निजी जीवनकाबारे सुनाउँदा दर्शकको हाँसो छुटाए।
‘तसम’ ढकालको १८ औं कृति हो। बुक हिलले पुस्तक प्रकाशन गरेको हो। यसअघि उनका ५ वटा उपन्यास, ७ वटा कथा संग्रह, बाल कथा संग्रह, निबन्ध संग्रह लगायत अनुवाद सहितका कृतिहरु प्रकाशित भइसकेका छन्।
भर्खरै
लोकप्रिय
