लागुऔषधसहित पोखराबाट ४ जना पक्राउ

पोखरा– ठूलो परिमाणको लागुऔषधसहित पोखराबाट ४ जना पक्राउ परेका छन्। इलाका प्रहरी कार्यालय शिसुवाले पोखरा २७ हमालचोकबाट ६ सय थान (एम्पुल) लागुऔषधसहित उनीहरुलाई पक्राउ गरेको हो।

पक्राउ पर्नेमा रुपेन्देही गैडहवा गाउँपालिका ८ बस्ने ३६ वर्षीया गौमती सुनार, सिद्धार्थनगर नगरपालिका १ बेकहिया बस्ने २६ वर्षीय प्रकाश पुन, भारत महाराजगञ्ज थाना नौतुनहवा अड्डा बजार बस्ने २८ वर्षीय महबुब आलम र सोही ठाउँका ३४ वर्षीय बालेश्वर प्रजापति रहेको जिल्ला प्रहरी कार्यालय कास्कीका प्रहरी निरीक्षक अनोज विकले जानकारी दिए।

उनीहरुको साथबाट डाइजापाम, फेनेरागन र नर्फिन गरी २/२ सय मात्राको ६ सय एम्पुल र नगद ११ हजार ४० भारतीय रुपैयाँ र ३ हजार २ सय ४५ नेपाली रुपैयाँ बरामद भएको प्रहरी निरीक्षक विकले जानकारी दिए । पक्राउ उपर थप अनुसन्धान अगाडि बढाइएको प्रहरीले जनाएको छ।