धनगढी – १८ दिन अघि कञ्चनपुरको शुक्लाफाँटा नगरपालिकाको कलुवापुरमा घर भित्रै मृत भेटिएका भण्डारी दम्पतीको हत्या आशंकामा पक्राउ परेका उनका छोरालाई प्रहरीले सार्वजनिक गरेको छ ।
जिल्ला प्रहरी कार्यालय कञ्चनपुरमा आमा बुवाको हत्या गरेको आरोपमा पक्राउ गरेका छोरा भरत भण्डारीलाई पत्रकार सम्मेलन गरेर सार्वजनिक गरेको हो ।
गत फागुन १५ गते घर भित्र मृत भेटिएका जयलाल भण्डारी र उनकी श्रीमती धनाको हत्यामा संलग्न भएको आशंकामा छोरा भरतलाई प्रहरीले डडेल्धुराबाट पक्राउ गरि सोमबार कञ्चनपुर ल्याएको हो ।
कंचनपुर प्रहरीका प्रवक्ता रविन्द्रनाथ पौडेलले भरतले बुबा र कान्छी आमाको धारिलो हतियार प्रहार गरी हत्या गरेको स्वीकार गरेको बताए ।
कलुवापुरस्थित घरमै हत्या गरेको अवस्थामा भेटिएका भण्डारी दम्पती र छोराबिच लामो समयदेखि सम्पतिको विषयमा घरायसी विवाद रहेको स्थानीयले बताएका छन् ।
भण्डारीले जेठी श्रीमतीको मृत्यु भएपछि धनालाई दुई वर्ष अघि मात्र कान्छी श्रीमतीको रुपमा भित्र्याएका थिए ।
आमाबुबाको हत्यापछि घरमा बेहोस अवस्थामा भेटिएकी ७ महिनाकी छोरीको धनगढीको माया मेट्रो अस्पतालमा उपचार भइरहेको छ ।
भर्खरै
लोकप्रिय
