नेपालगञ्ज-सरकारले उत्तर र दक्षिण नाका बन्द गरेको छ। मन्त्रीपरिषद्ले निर्णय गर्नुअघि नै बाँके प्रशासनले नेपालगञ्ज नाका सील गरिसकेको थियो ।
सीलपछिको नाकामा सोमबार विहान भने धेरै भिड थियो।
भारतका विभिन्न ठाउँबाट आएका पाँच सय बढी नेपाली रुपैडिहा फसेका थिए। उनीहरुलाई कसरी नेपाल ल्याउने भन्नेमा निर्णय गर्न भने धेरै समय लाग्यो । विहान चार बजे रुपैडिहामा आइपुगेका नेपालीलाई साढे एघार बजेपछि मात्रै पालैपालो नेपालगञ्ज भित्र्याइएको छ। नाकामा भारततिर जानेको पनि लाइन लामै थियो।
नाकामा लाइन लगाएर राखिएका नेपालीलाई स्वास्थ्य जाँच गरी माक्स लगाउन लगाउनुका साथै हात धुन लगाएर नेपाल प्रवेश गराइएको छ । प्रमुख जिल्ला अधिकारीको संयोजकत्वमा रहेको टाक्सफोर्सले स्थानीय महेन्द्र बहुमुखी क्याम्पसलाई क्वारेन्टाइनको रुपमा परिणत गर्दै भारतबाट आएका सबैलाई त्यहाँ राखिएको छ।
अलपत्र परेका नेपालीलाई व्यवस्थित तरिकाले नेपाल ल्याउन प्रदेश सांसद आइपी खरेल र कृष्णा केसी नमुना, प्रमुख जिल्ला अधिकारी कुमारबहादुर खड्का, नेपालगञ्जका मेयर डा. धवलशमशेर राणा, उपमेयर उमा थापामगर, एसपी वीरबहादुर ओली, सशस्त्रका एसपी दीपक अधिकारी, डीएसपी शिवबहादुर सिंहलगायतको टोली नाकामा पुगेका थिए।
सबैलाई नगर बसमा राखेर क्वारेन्टाइन बनाइएको महेन्द्र बहुमुखी क्याम्पसमा ल्याइएको छ। क्वारेन्टाइनमा सबैको स्वास्थ्य जाँच गर्ने र सम्बन्धित जिल्लालाई खबर गरेर पठाउने प्रमुख जिल्ला अधिकारी खड्काले बताए।
ज्वरो आएका, रुघाखोकी लागेका व्यक्ति भेटिएमा उनीहरुलाई यही उपचार गरिने छ। बिरामीलाई उपचार गर्नका लागि भेरी, शिक्षण अस्पतालमा बेड छुट्याइएको छ भने लायन्स डेन्टल अस्पताललाई ४० बेडको अस्थायी आइसोलेसन अस्पताल बनाइएको छ।
भर्खरै
लोकप्रिय
