जनकपुरधाम– विश्वभर महामारीको रुपमा फैलिएको कोरोना भाइरस (कोभिड–१९)को त्रास बढ्दै गएपछि जनकपुरधाममा रहेको जानकी मन्दिरको पट सर्वसाधारणका लागि बन्द गरिएकाे छ।
कोरोनाको त्रासका कारण जानकी मन्दिर पहिलो पटक सर्वसाधारणका लागि बन्द गरिएको हो। कोरोनाकाे संक्रमण बढ्न सक्ने खतरालाई ध्यानमा राख्दै मन्दिरमा भीड हुन नदिनका लागि मन्दिरको पट सर्वसाधारणका लागि बन्द गरिएको हो।
सर्वसाधारणका लागि मन्दिर बन्द भएता पनि प्रत्येक दिन बिहान बेलुका हुने पूजा अझै जारी रहेको जानकी मन्दिरका उत्तराधिकारी महन्थ रामरोशन दास वैष्णवले जानकारी दिए।
मन्दिरको पट सर्व साधारणका लागि जिल्ला प्रशासन कार्यालय धनुषाको आदेशमा बन्द गरिएको हो। सन् १९११ मा स्थापना गरिएको जानकी मन्दिर १ सय ९ वर्षको इतिहासमा पहिलो पटक सर्वसाधारणका लागि बन्द गरिएको हो।
रामनवमी आउन ५ दिन मात्रै बाँकी रहेको समयमा मन्दिर बन्द भएपछि रामनवमी मेलासमेत नलाग्ने भएको छ।
रामनवमीको अवसरमा जनकपुरधामको राम मन्दिर र जानकी मन्दिरमा विशेष पूजा अर्चना गरिन्थ्यो। तर यस पटक कारोनाको संक्रमणको डरले रामनवमीसमेत प्रभावित भएको छ।
भर्खरै
लोकप्रिय
