कोरोना भाइरसको महामारीबाट सबैभन्दा बढी प्रभावित भएको अमेरिकामा लकडाउन खुकुलो पार्न थालिएको छ।
लकडाउनको विरोधमा प्रदर्शन भइरहेका छन् । राष्ट्रपति डोनाल्ड ट्रम्पले ती प्रदर्शनकारीले समर्थन गरिरहेका छन् । उनले पर्याप्त परीक्षण पनि भइरहेको बताएका छन् ।
तर अमेरिकामा लागु सामाजिक तथा भौतिक दूरी कायम गर्ने सम्बन्धी नियम अर्थात लकडाउन खुलाउन र सार्वजनिक गतिविधि खुलाइ रहनका लागि कोरोना भाइरसको संक्रमण रहे नरहेको थाहा पाउनका लागि हुने परीक्षण अहिले भइरहेको भन्दा तीन गुणाले बढाउनु पर्ने विज्ञले बताएका छन् ।
हार्वर्ड विश्वविद्यालयका तीन अनुसन्धानकर्ताले यसका लागि दैनिक कम्तिमा पाँच लाख मानिसको परीक्षण गरिनु पर्ने बताएका हुन् । हाल अमेरिकामा दैनिक डेढ लाखको हाराहारीमा परीक्षण हुँदै आएको छ । यसरी हुँदै आएका परीक्षणमा २० प्रतिशतमा संक्रमण पुष्टि हुने गरेको छ ।
संक्रमित को छ र उसबाट संक्रमण फैलिने जोखिम कम गर्नका लागि परीक्षण बढाउनु पर्ने विज्ञले बताएका हुन् । अहिले अमेरिकामा भइरहेको परीक्षणमा संक्रमण पुष्टि हुने दर अति उच्च रहेको र यो निकै जोखिमपूर्ण रहेको विज्ञको भनाई छ ।
विश्व स्वास्थ्य संगठन (डब्लुएचओ) ले परीक्षण गरिएका मध्ये संक्रमण पोजेटिभ आउने दर तीनदेखि १२ प्रतिशतको बिचमा रहनु पर्ने उल्लेख गरेको छ । तर अमेरिकामा अहिले पनि संक्रमण पुष्टि हुने दर झण्डै २० प्रतिशत रहेको छ ।
आउँदो मे १ सम्म परीक्षण गरिएका मध्ये १० प्रतिशतमा मात्रै संक्रमण पुष्टि हुने अवस्था आउनका लागि परीक्षण दरलाई तीव्र गतिमा बढाउनु पर्ने अनुसन्धानमा उल्लेख छ । त्यसका लागि हरेक दिन झण्डै पाँच लाख ८० हजार मानिसको परीक्षण गरिनु पर्ने अनुसन्धान प्रतिवेदनमा उल्लेख छ ।
हार्वर्ड ग्लोबल हेल्थ इन्स्टिच्युडका फ्याकल्टी डिरेक्टर डा. आशिश झा, सर्जन तथा हार्वर्डका अनुसन्धानकर्ता डा. थोमस साइ र हार्वर्ड ग्लोबल हेल्थ इन्स्टिच्यूडका रिसर्च एसिस्टेन्ड बेन्जामिन ज्याकोब्सनले अनुसन्धान गरेका हुन् ।
अनुसन्धानकर्ताले यस्तो चेतावनी दिए पनि अमेरिकामा सार्वजनिक स्थल खुला गर्ने क्रम सुरु भइसकेको छ । स्थानीय समय अनुसार शुक्रबार बेलुकादेखि नै फ्लोडिराको ज्याक्सन भिला समुद्री किनार खुल्ला गरिएको छ । मानिसहरु त्यहाँ ठूलो संख्यामा गएको देखिएको छ ।
जोन हप्किन्स विश्व विद्यालयका अनुसार अमेरिकामा अहिलेसम्म कोभिड–१९ बाट ३८ हजार ६६४ जनाको ज्यान गएको छ । यस्तै संक्रमितको संख्या सात लाख ३२ हजार भन्दा बढी रहेको छ । अहिलेसम्म अमेरिकामा ३६ लाख ९० हजार भन्दा बढीको परीक्षण भएको छ ।
विश्वभर हालसम्म झण्डै एक लाख ६० हजारको कोरोना भाइरसका कारण निधन भएको छ भने संक्रमितको संख्या २३ लाख भन्दा बढी पुगेको छ ।
भर्खरै
लोकप्रिय
