काठमाडौँ– कर्णाली प्रदेशको जुम्लामा रहेको कर्णाली स्वास्थ्य विज्ञान प्रतिष्ठानमा कोरोना भाइरसको परीक्षणका लागि पीसीआर मेसिन जडान भएपछि यस क्षेत्रमा कोरोना भाइरसको परीक्षण सहज भएको छ।
प्रतिष्ठानमा पीसीआर मेसिन जडान भएसँगै कोरोनाको आशंका गरिएकाहरुको नमुना परीक्षणका लागि स्वाब सुर्खेत तथा नेपालगञ्ज पठाउनुपर्ने बाध्यता हटेको प्रतिष्ठानका निर्देशक डा. मंगल रावल बताउँछन्।
जुम्लामा पीसीआर मेसिनका साथै विशेषज्ञ सेवा उपलब्ध हुँदा यसक्षेत्रमा कोरोनाविरुद्धको लडाईँमा सहजता हुने जुम्लाकी प्रमुख जिल्ला अधिकारी दुर्गा बन्जाडेले बताइन्। अहिलेको कोरोना कहरबाट मुक्ती पाउन पीसीआर परीक्षणको उपकरण नै प्रतिष्ठानमा जडान हुँदा जनतालाई निक्कै राहत महशुस भएको उनको भनाइ छ।
प्रतिष्ठानमा पीसीआर परिक्षण मेशिन स्थापना भएको १५ दिनमै दुई हजार ७ सय ५५ जनाको स्वाब परीक्षण गर्दा सबैको रिपोर्ट नेगेटिभ आएको प्रतिष्ठानका निर्देशक डा. मंगल रावलले बताए।
प्रतिष्ठानले साबिक कर्णाली अञ्चलका पाँच वटै जिल्लाबाट स्वाबहरु संकलन गरेर परीक्षण कार्य गर्दै आएको छ। डोल्पा, मुगु र हुम्लाबाट स्वाब हेलिकप्टरमा ल्याएर परीक्षणको व्यवस्था गरिएको छ।
भर्खरै
लोकप्रिय
