कोरोना भाइरसविरुद्धको प्रभावकारी खोपको खोजीमा विश्वव्यापी प्रयास जारी रहेका बेला केही विज्ञहरुले अहिले प्रायः को पहुँचमै रहेका खोपहरु कोभिड–१९ मा काम आउन सक्ने बताएका छन्।
पोलियो विरुद्धको खोपसहितले बालबालिकाहरुलाई कोरोना भाइरसको संक्रमणबाट जोगाउन सक्ने यथेष्ट प्रमाण रहेको केही वैज्ञानिकले बताएका छन् ।
वैज्ञानिकहरुको एक समूहले बिहीबार साइन्स म्यागजिनमा एक आलेख लेखेर पोलियोसहितका खोपहरु कोरोना भाइरसविरुद्ध प्रभावकारी हुन सक्ने उल्लेख गरेका छन् ।
बिस्तारित रुपमा उपलब्ध रहेको थोपाका रुपमा खुवाइने पोलियोविरुद्धको खोप सुरक्षित, सस्तो र खुवाउन सजिलो वैज्ञानिकहरुले बताएका छन् । सो खोप हाल विश्वमा हरेक वर्ष एक अर्ब डोज उत्पादन हुने र १४० भन्दा बढी देशमा खुवाइने गरेको छ ।
यसरी पोलियोसहितका खोप नै प्रभावकारी हुन सक्ने सुझावसहितको आलेख लेख्नेमा अमेरिकाको फुड एण्ड ड्रग एड्मिनिस्ट्रेसनका खोप विज्ञ तथा एचआइभी पत्ता लगाएका विज्ञ रहेका छन् । पोलियोविरुद्धको खोपले विश्वबाट लगभग पोलियो उन्मुलन गरेको छ ।
एफडिएका कोन्स्टेनटिन चमाकोभ र मेरिल्याण्ड युनिभर्सिटीको स्कूल अफ मेडिसिन अन्तर्गत इन्स्टिच्युड अफ ह्युमन भाइरोलोजीका डा. रोबर्ट गालोसहितको टोलीले कोरोना भाइरसविरुद्ध पोलियोसहितका अहिले कायम रहेका खोप नै प्रभावकारी हुन सक्ने बताएका हुन् ।
गालो एड्स हुने एचआइभी भाइरस पत्ता लगाउने मध्येका एक हुन् भने चमाकोभ एफडिएको खोप विभागका सहायक निर्देशक हुन् ।
पोलियो र कोभिड–१९ हुने भाइरस पोजेटिभ–स्ट्यान्डर्ड आरएनए भाइरस रहेकाले पोलियोविरुद्धको ओपिभी (ओरल पोलियोभाइरस भ्याक्सिन) प्रभावकारी हुन सक्ने उनीहरुले बताएका हुन् ।
सो खोपले भाइरसविरुद्ध लड्नका लागि प्रतिरक्षा प्रणाली बलियो बनाउने भएकाले कोरोना भाइरसको संक्रमण हुन नदिनका लागि कम्तिमा अस्थायी रुपमा प्रभावकारी हुने उनीहरुले उल्लेख गरेका छन् ।
खोपले सम्बन्धित रोगको भाइरसबाट मात्रै नभएर अरु भाइरसबाट पनि जोगाउन सक्ने र कोरोना भाइरसको प्रकृति पोलियो भाइरससँग मिल्ने भएकाले विकल्पका रुपमा प्रयोग गर्न सकिने उनीहरुले आफ्नो आलेखमा उल्लेख गरेका छन् ।
भर्खरै
लोकप्रिय
