सिमकोट – हुम्ला जिल्लाका लागि मोबाइल टावर निर्माण गर्ने जिम्मेवारी पाएको एक भारतीय कम्पनीले काम अघि बढाउन सकेको छैन । एउटा टावरको को फाउण्डेसन निर्माण गर्ने बाहेक काम हुन सकेको छैन् ।
ताँजाकोट गाउँपालिका वडा नम्बर १ का पुनीमल खड्काले आफूले साढे दुई वर्ष अगाडि मोबाइल टावरको निर्माणको जिम्मेवारी पाएको एफ्टर प्राइभेट लिमिटेड कम्पनीसँग फाउण्डेसन निर्माणको जिम्मा लिए अनुसार काम सम्पन्न गरेर पनि भुक्तानी नपाएको बताए ।
टावरका लागि अन्य कुनै सामान आएको छैन । उनले जिम्मेवारी पाएको काम सम्पन्न गरी भुक्तानी माग्दा कम्पनीले दिएको छैन । खड्काले टावर निर्माणको सुरुवातका बेला कम्पनीका तर्फबाट एक भारतीय नागरिक र केही नेपाली स्थलगत अनुगमनका लागि आए पनि त्यसपछि उनीहरु कहिल्यै नआएको बताए ।
आफूले गरेको कामको भुक्तानी नपाएपछि उनले टेलिकमको केन्द्रीय कार्यालयमा उजुरी समेत गरेका छन् । कम्पनीमा गाउँपालिका अध्यक्ष बाग्दल मल्लको नेतृत्वमा टोली डेलिगेशन पनि गएको थियो तर निर्माणको कुरा नगरी आलटाल मात्र गरेपछि अध्यक्षको टोली टेलिकमको केन्द्रीय कार्यालयमै पुगेको थियो । अध्यक्ष मल्लको टोलीलाई टेलिकमले पनि कम्पनीलाई कालोसूचिमा राख्ने कुरा बताएको थियो । यसमा राजनीतिक चलखेल रहेको खड्काले बताए ।
गाउँमा मोबाइल सम्पर्क नभएर समस्या भएका बेला नयाँ टावर निर्माण गरेर मोबाइल सेवा सञ्चालनमा आउने हुम्लाबासीको सपना चाँडै पूरा हुने देखिँदैन । उक्त कम्पनीले जिल्लाका अन्य आठवटा स्थानमा मोबाईल टावर निर्माण गर्ने जिम्मेवारी पाएको भएपनि कतै काम सुरु गरेको छैन् ।
सो कम्पनीले मोबाईल टावर निर्माणको जिम्मेवारी पाएका स्थानहरुमा अदानचुली गाउँपालिकाको कालिका, सर्केगार्ड गाउँपालिकाको जैर, चंखेली गाउँपालिकाको मेल्छाम, सर्केगार्डको बराई, सिमकोट गाउँपालिकाको धारापोरी, नाम्खा गाउँपालिकाको केर्मी, नारा लेक र लिमी रहेका छन् ।
भर्खरै
लोकप्रिय
