सिमकोट – हुम्लाका विद्यार्थीहरुलाई पठन पाठन कार्यप्रति निरन्तर रुपमा बानी बसाली राख्न सिकाई सहजिकरण कक्षा सुरु भएका छन् ।
कोरोना कहरले लामो समय विद्यालयमा पठन पाठन कार्य बन्द हुँदा विद्यार्थीको सिकाइ क्रियाकलापमा प्रभावित नहोस् भन्नका लागि सहजिकरण कक्षा सुरु गरिएको हो।
चंखेली गाउँपालिका वडा नम्बर ४ का गोपाल शाहीले साना नानीले लेख्न र पढ्न बिर्सिएको बेला यो कक्षा सुरु भएपछि विद्यार्थीलाई सहज भएको बताए।
कक्षा दुईमा अध्ययन गर्ने नानीहरुले लेख्नसमेत बिर्सेका बेला अब सिकाई सहजिकरण कक्षाले त्यो समस्या समधान गर्ने उनले बताए ।
साना साना नानीले लामो समय पठन पाठन गर्न नपाएर बिर्सिन सक्ने समस्या आउन सक्ने देखिएपछि यो कक्षा अभ्यासकै लागि सञ्चालनमा ल्याइएको हो ।
सिकाई सहजिकरण कक्षा हुम्लामा पहिलो पटक सञ्चालनमा आएको हो । गुड नेवर्स इन्टरनेशनलका जिल्ला संयोजक वीरेन्द्र चौधरीले पहिलो पटक नमूनाको रुपमा आठ स्थानमा एक साथ यो कक्षा सुरु गरिएको बताए ।
हाललाई यी कक्षा प्राथमिक तहको विद्यार्थीलाई केन्द्रित गरेर सञ्चालन गरिएको छ । एउटा कक्षामा २० जना विद्यार्थीलाई दुई मिटरको दूरीमा राखेर कक्षामा सहभागिता गराउने व्यवस्था गरिएको छ ।
यसका लागि प्रतिकक्षा एक जना सहजकर्ता पनि परिचालन गरिएको छ । हाल चंखेली, सर्केगार्ड, खार्पुनाथ र सिमकोट गाउँपालिकामा यी कक्षा सञ्चालनमा आएका छन् ।
भर्खरै
लोकप्रिय
