इङ्लिस प्रिमियर लिग फुटबलको यो सिजन एभर्टनले अपराजित यात्रा कायमै राखेको छ। शनिबार साँझ भएको खेलमा साविक विजेता लिभरपुललाई २-२ गोलको बराबरीमा रोक्दै एभर्टनले तीन अंकको अग्रता लिएको छ।
घरेलु मैदानमा एभर्टन दुई पटक पछाडि परेको थियो। ९० औँ मिनेटमा एभर्टन १० खेलाडीमा सिमित भएको थियो। तर भ्रमणकारी टोली लिभरपुलले तीन अंक हात पार्न सकेन। अघिल्लो खेलमा एस्टन भिल्लासँग ७-२ गोलको अप्रत्यासित हार ब्यहोरेको लिभरपुल एभर्टनलाई हराउँदा शीर्षस्थानमा उक्लने अवसर उसलाई थियो।
खेलको तेस्रो मिनेटमै लिभरपुलले अग्रता लिएको थियो सेडियो मानेको गोलमा। तर एभर्टन पहिलो हाफमै बराबरीमा पुग्यो। उसका मिचाइल किनले १९ औँ मिनेटमा खेल बराबरीमा ल्याएका थिए। ७२ औँ मिनेटमा मोहम्मद सलाहले गोल गरेपछि लिभरपुल खेलमा २-१ गोलले अगाडि बढेको थियो।
तर दबाबबीच एभर्टनका डोभिनिक काल्भर्ट लेविनले ८१ औँ मिनेटमा गोल गरेर खेल बराबरीमा ल्याएका थिए। ९० औँ मिनेटमा एभर्टनका रिचार्लिसनले सोझै रातो कार्ड पाएका थिए। त्यसको २ मिनेटपछि लिभरपुलले गोल गरेपनि भिडियो असिस्टेन्ट रेफ्रीको सहायत एभर्टनले लिएको थियो जसमा गोल गर्ने लिभरपुलका खेलाडी अफसाइड देखिएका थिए।
पाँच खेलपछि एभर्टनको १३ अंक छ। समान खेलबाट १० अंक भएको लिभरपुल दोस्रो स्थानमा छ। तीन खेलबाट ९ अंक जोडेको एस्टन भिल्ला तेस्रो स्थानमा रहेको छ।
भर्खरै
लोकप्रिय
