नेपालगञ्ज – ब्राउनसुगरसहित नेपालगञ्जबाट विद्यार्थी पक्राउ परेका छन् । भारतको रुपैडियाबाट ब्राउनसुगर बोकेर आएका विद्यार्थी शिव कुँवर र जितेन्द्र नेपाली चार ग्राम ब्राउनसुगरसहित पक्राउ परेका हुन् । कुँवर १२ कक्षामा पढ्छन् । दुवैजना दाङका हुन् ।
उनीहरु दाङबाट नै ब्राउनसुगर लिन रुपैडिया आएका थिए । रुपैडियामा गएर ब्राउनसुगर किनेर फर्किँदा नाकामा पक्राउ परेका हुन् ।
स्रोतका अनुसार, जितेन्द्र ब्राउनसुगर पारखी नै हुन् । उनले दिनमा एक/दुई डोज लगाउँछन् ।
विद्यार्थी कुँवर भने भर्खरै सिक्दै थिए । साथी जितेन्द्रले नै उनलाई सिकाइरहेका थिए । लागु औषध दुर्व्यसनमा फस्नमा ‘साथी’ को प्रमुख हात रहने भुक्तभोगीहरु बताउँछन् । ‘एक पटक चाख न’ भन्दै दुर्व्यसनीले साथीलाई आफ्नो मार्गमा हिडाउने गर्दछन् ।
नेपालगञ्ज नाकाको भारतीय सीमावर्ती शहर रुपैडिया लागुु औषधको मामलामा बदनाम रहेको छ । सहजै ब्राउनसुगर पाइने भएकाले बाँके, बर्दिया, दाङ, सुर्खेत, दैलेखसम्मका प्रयोगकर्ता रुपैडिया पुग्ने गर्दछन् ।
नेपालगञ्ज घुम्न आएजस्तो गरेर सुटुक्क सीमापारी जाने र ब्राउनसुगर एक÷दुई डोज लगाएर केही बोकेर आउने गरिन्छ ।
पछिल्लो समयमा पहाडी जिल्लाका किशोर कुलतमा फसिरहेको नेपालगञ्जमा पक्राउ परेको तथ्यांकले देखाउँछ । रुपैडियामा किनेर लैजाने ब्राउनसुगर पहाडी जिल्लामा अभ महंगोमा बिक्री हुने पक्राउ परेकाहरु बताउँछन् ।
बाँकेमा भने चार हजार बढी लागु औषध प्रयोगकर्ता रहेका छन् । यहाँ हुने साना, ठूला चोरीमा दुर्व्यसनमा फसेकाहरु नै संलग्न रहेको प्रहरीको रिपोर्ट रहेको छ ।
स्कूल–कलेज तथा गाउँ शहरमा दुर्व्यसनी विरुद्ध जनचेतनामुलक कार्यक्रमहरु चलाइरहे पनि त्यसले खासै प्रभाव पारेको छैन ।
भर्खरै
लोकप्रिय
