ग्यारेथ बेलको गोलको सहयोगमा जोसे मोरिन्होको टिम टोटनह्यामले महत्वपूर्ण जित दर्ता गरेको छ।
इंग्लिस प्रिमियर लिग फुटबल अन्तर्गत आइतबार राति भएको खेलमा टोटनह्यामले ब्राइटनलाई २–१ ले पराजित गरेको हो ।
घरेलु मैदानमा भएको खेलमा १३ औँ मिनेटमा पाएको पेनाल्टीमा ह्यारी केनले गोल गरी टोटनह्यामलाई सुरुवाति अग्रता दिलाए ।
ब्राइटनका लागि तारिक लाम्प्टीले ५६ औँ मिनेटमा बराबरी गोल गरे । यहि सिजन रियल मड्रिडबाट पुरानो क्लब आएका बेलले ७३ औँ मिनेटमा गोल गरी टोटनह्यामलाई जित दिलाएका हुन् । उनले टोटनह्याम आएपछि गरेको यो पहिलो गोल हो ।
जितपछि सात खेलबाट १४ अंक जोडेको टोटनह्याम दोस्रो स्थानमा उक्लिएको छ । उ पहिलो स्थानको लिभरपुल भन्दा दुई अंकले पछि रहेको छ ।
यसैबिच एभर्टनले शीर्ष स्थानमा फर्किने मौका गुमाएर तेस्रो स्थानमा पुगेको छ । लिग अन्तर्गत आइतबार राति नै भएको खेलमा एभर्टन न्यूक्यासलसँग २–१ ले पराजित भएको हो ।
न्यूक्यासलका लागि कालम विल्सनले दुई गोल गरे । एभर्टनका लागि काल्भर्ट–लेविनले इन्जुरी समयमा एक गोल फर्काए पनि हार टार्न सकेनन् ।
पराजित भएको एभर्टन सात खेलबाट १३ अंकसहित तेस्रो स्थानमा झरेको छ । ११ अंकसहित न्यूक्यासल ११ औँ स्थानमा छ ।
भर्खरै
लोकप्रिय
