जनकपुरधाम-प्रदेश-२ मा प्रदेश सांसद र प्रमुख जिल्ला अधिकारी सहित थप ६७ जनामा कोरोना संक्रमण पुष्टि भएको छ।
यससँगै यस प्रदेशमा कोरोना संक्रमितको संख्या १५ हजार ७ सय ४२ पुगेको स्वास्थ्य निर्देशनालय प्रदेश २ का निमित्त निर्देशक विजय झाले जानकारी दिए ।
गौर अस्पताल रौतहट, बर्दिबास कोभिड १९ प्रयोगशाला महोत्तरी, प्रादेशिक जनस्वास्थ्य प्रयोगशाला जनकपुर, नारायणी उपक्षेत्रीय अस्पताल वीरगंज र गजेन्द्र नारायण सिंह सगरमाथा अस्पताल राजविराजमा गरिएको परीक्षणमा प्रदेश सांसद परमेश्वर साह र धनुषाका प्रमुख जिल्ला अधिकारी प्रेम प्रसाद भट्टराई सहित ६७ जनामा कोरोना संक्रमण पुष्टि भएको स्वास्थ्य निर्देशनालयले जनाएको छ ।
सोमबार धनुषामा २१, पर्सामा १३, सिरहामा ७, रौतहटमा ६, बारामा ५, महोत्तरीमा ४, सर्लाहीमा २, सप्तरीमा १ र अन्य प्रदेशका ८ जनामा कोरोना संक्रमण पुष्टि भएको छ ।
त्यस्तै पछिल्लो २४ घण्टामा थप ९८ जना कोरोना संक्रमित निको भएर डिस्चार्ज भएका छन्। यससँगै निको हुनेको संख्या १४ हजार ३ सय २२ पुगेको छ । आज पर्सामा ८६, सप्तरीमा ८, धनुषामा ३ र सिरहामा १ जना कोरोना संक्रमित निको भएर डिस्चार्ज भएका छन् ।
पछिल्लो २४ घण्टामा थप दुईजना कोरोना संक्रमितको मृत्यु भएको छ । यस सँगै मृत्यु हुनेको संख्या १ सय ७० पुगेको स्वास्थ्य निर्देशनालयले जनाएको छ ।
आज बाराको निजगढ नगरपालिका वडा नं. ९ का ६२ वर्षीय पुरुष र सिरहाको सुखिपुर नगरपालिका वडा नं. ४ घर भइ प्रादेशिक अस्पताल जनकपुरधाममा उपचाररत्त रहेका ६४ वर्षीय पुरुषको कोरोना संक्रमणबाट मृत्यु भएको छ ।
भर्खरै
लोकप्रिय
