मोरङ-प्रदेश १ मा कोरोना भाइरस कोभिड १९ का ५६ जना नयाँ संक्रमित थप भएका छन् ।
सामाजिक विकास मन्त्रालय प्रदेश १ का अनुसार मंगलबार १ सय ७६ जनाको पिसिआर परिक्षण गरिएकोमा २० महिला र ३६ पुरुषमा संक्रमण पुष्टि भएको हो।
यसक्रममा मोरंगमा ३१, झापामा १७, सुनसरीमा ४, इलाममा १ र प्रदेश १ बाहिरका ३ जना रहेकाछन् । प्रदेश राजधानी विराटनगरमा १९, उर्लाबारी नगरपालिकामा ८ र मिक्लाजुङ गाँउपालिकामा ४ जनामा संक्रमण देखिएको छ।
झापाको दमक नगरपालिकामा १०, गौरादह नगरपालिकामा ५, गौरीगञ्ज र मेचीनगर नगरपालिकामा समान १ जनामा संक्रमण पुष्टि भएको छ।
सुनसरीको बराहक्षेत्र नगरपालिकामा २, देवानगञ्ज गाँउपालिका र इनरुवा नगरपालिकामा समान १ जनाको पिसिआर रिपोर्ट पोजिटिभ आएको छ। त्यसैगरि, पहाडी क्षेत्र इलाममा १ र प्रदेश १ बाहिरको ३ जनाको रिपोर्ट पोजिटिभ आएको मन्त्रालयले जनाएको छ।
अर्कोतर्फ प्रदेशमा मंगलबार ७ सय ४० जना संक्रमित निको भएर डिस्चार्ज भएका छन्। मन्त्रालयका अनुसार प्रदेशका विभिन्न स्थानका होम आईसोलेसनबाट ७ सय ३४ र बुढीगंगा गाँउपालिकास्थित विराट शिक्षण अस्पतालबाट ६ जना डिस्चार्ज भएका हुन्। यससंगै हालसम्म प्रदेशमा डिस्चार्ज हुनेको संख्या १८ हजार ८ सय ६८ पुगेको छ।
प्रदेशमा मंगलबार ४ जना महिला संक्रमितको मृत्यु भएको छ । मोरंगमा १ महिला, सुनसरीमा २ महिला र तेह्रथुममा १ महिलाको संक्रमितको मृत्यु भएको हो।
यससंगै प्रदेशमा हालसम्म २ सय ९३ जना संक्रमितको उपचारका क्रममा मृत्यु भएको मन्त्रालयले जनाएको छ। जसमा ९२ जना महिला र २ सय १ जना पुरुष रहेकाछन् ।
भर्खरै
लोकप्रिय
