काठमाडौँ – विवाद र अन्योलबीच सुरु भएको सत्तारुढ नेकपाको स्थायी समितिको बैठक सौहाद्रपूर्ण वातावरणमा सकिएको छ।
प्रधानमन्त्री निवास बालुवाटारमा बसेको बैठकले दुई अध्यक्षबीच भएको चार बुँदे सहमितलाई सर्वसम्मतिले अनुमोदन गर्दै बुधबारको बैठक सकिएको हो।
प्रवक्ता नारायणकाजी श्रेष्ठका अनुसार बैठकले मंगलबार जारी भएको संवैधानिक परिषद् सम्बन्धी ऐन संशोधन अध्यादेश फिर्ता लिने र संसदको विशेष अधिवेशन माग गर्दै राष्ट्रपति कार्यालयमा दर्ता भएको प्रस्ताव पनि फिर्ता लिने निर्णय गरेको छ।
बैठकमा प्रधानमन्त्री एवं संवैधानिक परिषदका अध्यक्षसमेत रहेका केपी शर्मा ओलीले मंगलबार बेलुका बसेको परिषदको बैठकले कुनै सिफारिस नगरेको जानकारी गराएका छन्।
अध्यक्ष ओलीको भनाइ उद्धृत गर्दै प्रवक्ता श्रेष्ठले भने, ‘आजको बैठकमा अध्यक्ष ओलीले हिजोको संवैधानिक परिषद्को बैठकमा कुनै पनि सिफारिस नभएको जानकारी गरानुभयो।’
दुई अध्यक्षबीच भदौ २६ गतेको स्थायी समितिको निर्णयका आधारमा अघि बढ्ने गरी चार बुँदे सहमितसमेत भएको बैठकलाई जानकारी गराइएको थियो। अब स्थायी समिति बैठक पुस ५ गते र ५ गतेका लागि तय भएको केन्द्रीय समिति बैठक पुस १० गते बस्ने श्रेष्ठले बताए।
भर्खरै
लोकप्रिय
