इंग्लिस प्रिमियर लिग फुटबल अन्तर्गत आइतबार राति भएको खेलमा म्यानचेस्टर युनाइटेडले प्रभावशाली जित दर्ता गरेको छ । लीड्स युनाइटेडलाई ६–२ ले पराजित गरेको म्यानचेस्टर युनाइटेड तेस्रो स्थानमा पुगेको छ ।
म्यानचेस्टरका लागि ब्रुनो फेर्नान्डेस र स्कट म्याकटोमिनेयले दुई–दुई गोल गरे । यस्तै भिक्टोर लिण्डेलोफ र डानियल जेम्सले एक–एक गोल गरे । लीड्सका लागि लियम कुपर र स्टूआर्ट डालासले गोल गरेका हुन् ।
घरेलु मैदानमा भएको खेलमा म्याकटोमिनेयले दोस्रो र तेस्रो मिनेटमा गोल गरेका हुन् । उनी पहिलो तीन मिनेट भित्रै दुई गोल गर्ने पहिलो खेलाडी बनेका छन् प्रिमियर लिगमा ।
यस्तै फेर्नान्डेसले २० र ७० औँ मिनेटमा गोल गरे । लिण्डेलोफले ३७ औँ तथा जेम्सले ६६ औँ मिनेटमा गोल गरेका हुन् । लीड्सका कुपरले ४१ औँ तथा डालासले ७३ औँ मिनेटमा गोल गरेका हुन् ।
जितपछि तेस्रो स्थानमा पुगेको म्यानचेस्टर युनाइटेडको १३ खेलबाट २६ अंक भएको छ । लीड्स १७ अंकसहित १४ औँ स्थानमा छ ।
लिग अन्तर्गत आइतबार राति भएका अरु खेलमा एस्टन भिल्लाले वेष्ट ब्रोमलाई ३–० ले पराजित गर्दा ब्राइटन र शेफिल्ड युनाइटेडले १–१ को बराबरी खेलेका छन् ।
भर्खरै
लोकप्रिय
