शीर्ष स्थानको होडमा रहेका लेस्टर सिटी र म्यानचेस्टर युनाइटेडले बराबरी खेलेर अंक बाँडेका छन् । इंग्लिस प्रिमियर लिग फुटबल अन्तर्गत शनिबार राति भएको खेलमा लेस्टर र म्यानचेस्टर युनाइटेडले २–२ को बराबरी खेलेका हुन् ।
अवे मैदानमा भएको खेलमा मार्कश राशफोर्डको गोलबाट २३ औँ मिनेटमा युनाइेटडले अग्रता लियो । ३१ औँ मिनेटमा बार्नेसले लेस्टरका लागि बराबरी गोल पर्काए ।
७९ औँ मिनेटमा ब्रुनो फेर्नान्डेसले गोल गरि पुनः युनाइटेडलाई अग्रता दिलाए । तर ८५ औँ मिनेटमा युनाइटेडकै एक्सेल तुएन्जेबाले आत्मघाती गोल गरेपछि लेस्टरको बराबरी भयो ।
बराबरीपछि तेस्रो स्थानमा झरेको लेस्टरको १५ खेलबाट २८ तथा चौथो स्थानको म्यानचेस्टर युनाइटेडको २७ अंक भएको छ । शनिबार राति नै भएको खेलमा शेफिल्ड युनाइटेडलाई १–० ले पराजित गरेको एभर्टन १५ खेलबाट २९ अंकसहित दोस्रो स्थानमा उक्लिएको छ ।
इंग्लिस प्रिमियर लिग अन्तर्गत शनिबार राति नै भएको खेलमा पाँचौँ स्थानको म्यानचेस्टर सिटीले न्यूक्यासल युनाइटेडलाई २–० ले पराजित गरेको छ । सिटीको १४ खेलबाट २६ अंक भएको छ ।
अरु खेलमा एस्टन भिल्लाले क्रिष्टल प्यालेसलाई ३–० ले पराजित गर्दा फुलम्याम र साउथह्याम्पटनले गोलरहित बराबरी खेलेका छन् ।
भर्खरै
लोकप्रिय
