धनगढी– सुदूरपश्चिम प्रदेशमा आइतबार थप ६२ जनामा कोरोना संक्रमण पुष्टि भएको छ। प्रदेश सामाजिक विकास मन्त्रालयका अनुसार प्रदेशका ३ वटा प्रयोगशालामा गरिएको परीक्षणमा ६२ जनामा संक्रमण पुष्टि भएको हो।
मन्त्रालयका अनुसार सेती प्रादेशीक अस्पतालको परीक्षणमा ५६ जना, जिल्ला अस्पताल बझाङको परीक्षणमा ५ जना र अछामको कमलबजार प्रयोगशालाको परीक्षणमा एक जनामा कोरोना संक्रमण पुष्टि भएको छ।
सेती प्रादेशिक अस्पताल प्रयोगशालामा पछिल्लो २४ घण्टामा २ सय ९० नमूना परीक्षण गर्दा ५६ जनामा संक्रमण पुष्टि भएको छ। अस्पतालका सूचना अधिकारी दिलिपकुमार श्रेष्ठका अनुसार संक्रमण पुष्टि हुनेमा धनगढी उपमहानगरपालिकामा १५ जना रहेका छन्।
यसैगरी कैलालीको गोदावरीका ९ जना, गौरीगंगा नगरपालिकाका ६ जना, घोडाघोडी, टिकापुर, कैलारीका एक/एक जनामा संक्रमण पुष्टि भएको छ। यस्तै, कञ्चनपुरको भीमदत्तका ९ जना, बेलौरीका ७ जना, बेदकोटका २ जना, लालझाँडी, कृष्णपुर, र स्थानीय तह नखुलेका एक/एक जनामा कोरोना संक्रमण पुष्टि भएको अस्पतालले जनाएको छ।
यस्तै बझाङमा गरिएको परीक्षणमा ५ जनामा संक्रमण पुष्टि भएको छ भने अछामको कमलबजारको प्रयोगशालामा एक जनामा संक्रमण पुष्टि भएको सामाजिक विकास मन्त्रालयले जनाएको छ।
योसँगै सुदूरपश्चिम प्रदेशमा कोरोना संक्रमितको संख्या १३ हजार ३ सय ६० पुगेको छ। संक्रमण पुष्टि भएका मध्ये १० हजार ७ सय ६७ जना डिस्चार्ज भएका छन् भने हालसम्म ५० जना संक्रमितको मृत्यु भएको छ।
भर्खरै
लोकप्रिय
