काठमाडौँ- चिनियाँ पुरुषका लागि नेपालबाट युवती ओसारपसार भइरहेको प्रहरीले दाबी गरेको छ। भिजिट भिसामा चिन पुगेकी एक नेपाली महिला यातना पाएर फर्किएपछि एक जनालाई पक्राउ गरिएको प्रहरीको मानव बेचबिखन अनुसन्धान ब्युरोले जनाएको छ।
ब्युरोका अनुसार पक्राउ पर्नेमा काभ्रेको रोशी गाउँपालिका-४ का ३२ वर्षीय किरण तामाङ छन्। तामाङले एक २३ वर्षीय युवतीलाई गत वर्षको पुस २५ गते चीनको सान्दोङ प्रान्तस्थित हेज शहरको ताङ-लो टोलमा ताम्पु थोङ भन्ने एक चिनियाँ पुरुषको घरमा पुर्याएको ब्युरोले जनाएको छ।
ब्युरोका अनुसार ती चिनियाँ युवकले नेपाली युवतीमाथि शारीरिक शोषण गरेका थिए। पीडित नेपाली महिला गत कात्तिक १२ गते नेपाल फर्किएकी थिइन्। ब्युरोका एक अधिकारीका अनुसार तामाङ चिनियाँ भाषा राम्रोसँग बोल्न जान्दछन्। चीनमा राम्रो रोजगारी पाइने भन्दै ती महिलालाई निशुल्क त्यहाँ पुर्याइएको ब्युरोको दावी छ।
‘चिनियाँ पुरुषहरुसँग तामाङको सम्बन्ध राम्रो देखिन्छ। उनले नेपाली युवती खोजेर उनिहरुलाई दिने गरेको प्रारम्भिक अनुसन्धानबाट खुलेको छ’, ब्युरोका एक अधिकारीले भने।
भर्खरै
लोकप्रिय
